Образцы приветственных адресов на якутском языке

Кырылас кумахтаах бэс чагда тулалаах,

баай устуоруйалаах ытык-мааны кыһабытыгар,

араас сылларга үлэлээбит учууталларга, тирэх үлэһиттэргэ,

бары көлүөнэ устудьуоннарга, билиҥҥи кэллэктиипкэ!

 

Ыраах сылдьан ыра санаа гынар, ханна да буолларбыт барҕарда аатырдар олохпутугар олук уурбут кырдьаҕас кыһабыт төлкөлөөхтүк төрүттэммитэ, олохтоохтук оҥкулламмыта төгүрүк 100 сыллаах өрөгөйдөөх үбүлүөйэ үүммүтүнэн ________ сыллардааҕы устудьуоннарын, ааттарыттан ис сүрэхпититтэн иэйэн-куойан эҕэрдэлээтэхпит буоллун!

Хаһан эрэ эдэркээн кыргыттар, уолаттар Бүлүүтээҕи учуутал кыһатыгар Ульяна Федоровна Кондакова инникини, кэскиллээҕи санаан дьаныардаах дьүккүөрүнэн арыйтарбыт Саха салаатыгар маҥнайгы хараҥаччылар буолан билиини сомсо, үрдүккэ талаһа үөрэнэ киирбиппит... Ол кэмтэн үгүс сыллар усталарын тухары тапталлаах кыһабытыгар сүүһүнэн ыччат үөрэх-билии үлүскэнин үлүмнэһэн, куорсун анньынан үрдүккэ өрө дайар алгыстаах аартыктарын аана арыллыбыта. Оччотооҕу оҕо дьон дьоһумсуйан, учууталларбыт иһирэх иитиигитинэн, амарах такайыыгытынан ылбыт билиибитин, сатабылбытын, арыллыбыт талааммытын кынат оҥостон, олохпут суолунан айаммытын салгыыбыт. Билиигэ-көрүүгэ уһуйбут үөрэнээччилэргит Өрөспүүбүлүкэбит араас муннуктарыгар ситиһиилээхтик үлэлээн Эһиги ааккытын ааттаталлар, Эһиэхэ сүгүрүйэллэр.

Кыһабыт 100 сыллаах үлэтин-хамнаһын, айымньылаах кэрдиис кэмнэрин туһунан өйдөбүл араас көлүөнэ үөрэнээччилэригэр сырыттаҕа. Ону барытын оҕуруолуу тистэххэ, олох, үөрэх, сайдыы туһунан уһун остуоруйа суруллуох эбит, истиҥ иэйии туһунан иилээн-саҕалаан эттэххэ, ситэн этиллибэт дьикти-кэрэ сэһэн буолан иһиллиэх эбит. Араас сылларга мантан кынаттанан үгүс ыччат үрдүккэ өрө көтөн үөрэх, култуура эрэ буолбакка, олох бары эйгэтигэр таһаарыылаахтык үлэлээбиттэрэ, үлэлииллэр. Нэһилиэктэрин, улуустарын, Өрөспүүбүлүкэбит сайдыытыгар тус кылааттарын киллэрэллэр.

Ыччаты идэҕэ уһуйууга ытык-мааны кыһабытыгар, үлэлиир кэллэктиипкэ инникитин да маннык уустук, эппиэттээх эйгэҕэ сөҕүөрбэт төлөннөөх үтүө түмүктээх үлэни, кэм эридьиэстээх кэрдиистэрин сиэрдээхтик туоруурга ситиһиилэри баҕарабыт. Кэлэр өттүгэр өссө да аҕам саастаах үөрэнээччилэргит үөрүүлээх күннэргэ тоҕуоруһан кэлэн олохторун ситиһиитин кэпсээн аастыннар. Ол үллэр үйэлэргэ хатылана туруохтун! Кыһабыт анала – оннук! «Ииппит – иэстээх» диэн – кырдьык.

 

Уруй-туску! Айхал-мичил!

 

Саха салаатын ___________ сыллардааҕы устудьуоннара

 

2023 сыл кулун тутар ыйын ____ күнэ

 

 

Уважаемая ______________!

 

 

Сердечно поздравляем с 30-летием педагогической деятельности!

Мы искренне восхищаемся вашим жизненным оптимизмом, настойчивостью, преданностью избранному пути, добротой и душевным теплом, способностью бескорыстно делиться опытом работы с коллегами. Вы – Учитель с большой буквы! За период трудовой деятельности Вы всегда проявляете исполнительность, отзывчивость и большое трудолюбие. Выражаем признательность за ваш добросовестный труд.

От всей души желаем Вам, Вера Дмитриевна, крепкого здоровья, неиссякаемой энергии, творческого долголетия, счастья, семейного благополучия и светлого праздничного настроения.

 

 

  Пусть в жизни все Вас радует:

             И солнце – светом и теплом,

             И ветер – свежею прохладою,

             И люди – лаской и добром.

 

 

 

 

 

 

Учителя МО гуманитарного цикла

 

 

 

 

 

 

 

 

 

 

 

 

 

 

 

Ытыктыыр учууталбытын, Арассыыйа Федерациятын үөрэҕириитин Туйгунун, “Учууталлар учууталларын”, Бүлүү улууһа (оройуона) МТ бочуоттаах бэтэрээнин __________________ 75 сааскын бэлиэтиир дьоһун күҥҥүнэн Улуу нуучча тылыгар уһуйбут үөрэнээччилэриҥ ис сүрэхтэн итиитик-истиҥник эҕэрдэлиибит!

Эн өр сылларга талан ылбыт идэҕинэн харыс да сири   халбарыйбакка үүнэр ыччаты иитиигэ үтүө суобастаахтык үлэлээтиҥ.  Үгүс көлүөнэ ыччаты нуучча тылыгар, биология, химия курдук уустук биридимиэттэргэ үөрэттиҥ-такайдыҥ, олох киэҥ аартыгар сирдээтиҥ. Үөрэппит оҕолоруҥ Өрөспүүбүлүкэ араас муннуктарыгар үлэлии-хамсыы сылдьалларыттан астынабыт, үөрэбит!

Эн кырдьыыны кыйдаан, уопсастыба олоҕун үөһүгэр аҕам саастаах дьону түмэн ситиһиилээхтик үлэлии-хамсыы сылдьаргынан, нэһилиэгиҥ дьонун-сэргэтин ытыктабылын ыларгынан киэн туттабыт!

Эн биһиэхэ өрүү олоххо, үлэҕэ сыһыаҥҥынан, киэҥ билиигинэн, ирдэбилгинэн үтүө холобур буолаҕын! Үөрэппит-такайбыт, иҥэрбит билииҥ, сырдыкка-кэрэҕэ уһуйууҥ, сүбэҥ-амаҥ иһин барҕа махталбытын тиэрдэбит!

 

Күндү __________________!

Эйиэхэ туйгун доруобуйаны, нус-хас олоҕу, билиҥҥиҥ курдук эдэрдии эрчимнээхтик олох үөһүгэр үөрэ-көтө сылдьаргар, үөлээннээхтэриҥ истиҥ-иһирэх сыһыаннарыгар, өйөбүллэригэр уйдаран, оҕолоруҥ, сиэннэриҥ, хос сиэннэриҥ тапталларынан, ситиһиилэринэн дуоһуйан, этэҥҥэ олороргор баҕарабыт!

 

 

Үөрэппит оҕолоруҥ, нуучча тылын, литэрэтиирэтин учууталлара:

 

2017 сыл кулун тутар ыйын 7 күнэ

 

 

 

 

 

 

 

 

 

 

 

 

 

 

 

 

 

 

 

 

 

Ытыктыыр Учууталбыт _______________!

 

 

Хаһан эрэ кыракый уолаттар успуорт саалатын аанын арыйан аан бастаан дьарыкка кэлбиппит. Эн инникини, кэскиллээҕи санаан дьаныардаах дьүккүөргүнэн успуорт умсулҕаныгар угуйан, бастакы сэмэй ситиһиилэрбититтэн оҕолуу дьолломмуппут. Ол кэмтэн ыла бэлиэр үгүс сыл-хонук ааһа оҕуста... Оччотооҕу оҕо дьон дьоһумсуйан, Учууталбыт дьаныардаах дьарыккынан, аҕалыы такайыыгынан ылбыт сатабылбытын, арыллыбыт талааммытын кынат оҥостон, олохпут суолунан айаммытын салгыыбыт. Успуорт умсулҕаныгар уһуйбут үөрэнээччилэриҥ Өрөспүүбүлүкэбит араас муннуктарыгар ситиһиилээхтик үлэлээн, Өрөспүүбүлүкэҕэ эрэ буолбакка, Арассыыйаҕа, Аан дойдуга тиийэ үтүмэн үрдүк ситиһии өрөгөйүн билэн, төрөөбүт нэһилиэкпитин сэргэ Эн ааккын ааттаталлар, Эйиэхэ сүгүрүйэллэр!

Биһиги Эйигин идэтигэр олус бэриниилээх, саталлаах-дьаһаллаах, үүнэр көлүөнэни иитиигэ-үөрэтиигэ сүҥкэн ситиһиилэрдээх, уҕараабат дьулуурдаах Учуутал бастыҥ холобурун быһыытынан билинэбит.

Эн амарах-сайаҕас сыһыаҥҥын, үлүскэннээх түбүктээх үлэҕин үрдүктүк сыаналыыбыт. Сүрэххин-санааҕын ууран үөрэппит оҕолоргун билигин да уһуйа-такайа сылдьаргын астына-дуоһуйа көрөбүт. Ахсаабат кыһамньыҥ, уҕараабат болҕомтоҥ иһин ис сүрэхпититтэн махтанабыт. Учууталбыт барахсан, Эйиэхэ үөрэммит кэммит өйбүтүгэр-сүрэхпитигэр үтүө эрэ өйдөбүл буолар!

 

Күндү киһибит ____________________!

 

Эйиэхэ улахантан улаханы, улуукантан улууну, умуллубат уоту, уҕараабат уоҕу баҕарабыт. Күн-дьыл өксүөнүн билиммэккэ, ыалдьар-кырдьар диэни аахсыбакка, эдэрдии эрчимнэнэн, сэргэхтик туттан-хаптан, чугас дьонуҥ сылаас тапталынан кынаттанан мэлдьи үөрэ-көтө сырыт! Чэгиэн-чэбдик бэйэлээх, үөрүү-көтүү эҥээрдээх, дьол-соргу тулалаах, туппуккун тупсара, ылсыбыккын ыпсара сырыт диэн алҕаатахпыт буоллун!

Үөрүү-көтүү өрөгөйдөн, дьол-соргу кынаттан!

 

 

 

 

Араас сылларга успуорка угуйбут иитиллээччилэриҥ

 

2023 сыл

 

 

 

 

 

Ытыктабыллаах _______________________ !

 

Атааннаах-мөҥүөннээх Аан дайды атыйахтаах уулуу айманар, иитиллибит Ийэ дойдубут кэлэр кэскилэ кэһиллэр, тахсар саһарҕата сарбыллар быһаарыылаах кэмнэригэр өбүгэ саҕаттан олохтоммут Олоҥхобут боотурдарын аналынан бар дьон, Ийэ сир туһугар Арассыыйа элбэх ахсааннаах норуоттарын сэргэ Эн эмиэ ытык иэс толоро аттаммытыҥ.

Тугунан да кэмнэммэт хорсун быһыыгынан, кытаанах санааҕынан, модун дьулуургунан кэнчээри ыччакка Аҕа дойдуга тапталы иҥэриигэ, дойдунаат тыыныгар иитиигэ, олох суолтатын өйдүүргэ тулхадыйбат холобур буолаҕын. Саалаахтан самныбакка, охтоохтон охтубакка, туруоруммут сыалы толору ситиһэн иэримэ дьиэҕэр этэҥҥэ эргиллэн кэлбиккинэн ис сүрэхтэн эҕэрдэлиибит! Сарсыҥҥы ыраас халлааммыт, нус-хас эйэлээх олохпут туһугар турууласпыт Боотур Уоламмытыгар барҕа махтал тылларын этэбит!

Дьон киһитэ буолан торолуй,

Киһи киһитэ буолан сит,

Эр санааҥ кэхтибэтин,

Бигэ тылыҥ бэттибэтин.

Эрэх-турах сылдьан,

Өрөйөн-чөрөйөн биэр.

Дохсунтан толлубакка,

Ахсымтан чаҕыйбакка

Элбэҕи бэйэҕэр түмп,

Эрэли сүтэримэ.

Хабарааҥҥа хаайтарбат

Хаадыат майгыланан,

Үтүргэҥҥэ-хабырҕаҥҥа бэриммэт

Үтүө киһи буолан

Өрөгөйтөн туораама!

 

 

 

Оскуола

2023 сыл ахсынньы 4 күнэ

 

 

 

Мааны дьонноох ___________ түбэтин

баай устуоруйалаах ____________ нэһилиэгин

ыччаты иитэр-үөрэтэр ытык-мааны кыһатыгар

араас сылларга үлэлээбит учууталлара, тирэх үлэһиттэрэ,

бары көлүөнэ үөрэнээччилэрэ, оскуола билиҥҥи кэллэктиибэ!

 

            Ыраах сылдьан ыра санаа гынар, ханна да буолларгыт барҕарда аатырдар олоххутугар олук уурбут оскуолаҕыт төлкөлөөхтүк төрүттэммитэ, олохтоохтук оҥкулламмыта төгүрүк 100 сыллаах өрөгөйдөөх үбүлүөйэ үүммүтүнэн ____________________ орто оскуолатын кэллэктиибин, үөрэнээччилэрин ааттарыттан ис сүрэхпититтэн иэйэн-куойан эҕэрдэлээтэхпит буоллун!

         Араас сылларга бу кыһаҕа иитиллэн үөрэх сырдыгын, билии умсулҕанын ылынан, оҕо-аймах буолан күйгүөрэн, доҕордоһон-атастаһан, учуутал үтүө сүбэтин, арыт сэмэтин да истэн, олох киэҥ аартыгар тахсыбыт үөрэнээччилэр махталлаах санаа бастыҥын аныыллар. 100 сыллаах үлэтин-хамнаһын, айымньылаах кэрдиис кэмнэрин туһунан өйдөбүл араас көлүөнэ үөрэнээччилэригэр сырыттаҕа. Ону барытын оҕуруолуу тистэххэ, олох, үөрэх, сайдыы туһунан уһун остуоруйа суруллуох эбит, истиҥ иэйии туһунан иилээн-саҕалаан эттэххэ, ситэн этиллибэт дьикти-кэрэ сэһэн буолан иһиллиэх эбит.

         Эһиги оскуолаҕыт үүнэр көлүөнэни иитиигэ-үөрэтиигэ улуус биир кырдьаҕас кыһата буолар. Араас сылларга мантан кынаттанан үгүс ыччат үрдүккэ өрө көтөн култуура, үөрэх, тыа хаһаайыстыбатын эйгэтигэр таһаарыылаахтык үлэлээбиттэрэ, үлэлииллэр. Өрөспүүбүлүкэ, улуус, нэһилиэк сайдыытыгар тус кылааттарын киллэрэллэр. Биһиги оскуолабыт бүгүҥҥү кэллэктиибигэр эмиэ бу кыһаттан куорсун анньыммыт урукку үөрэнээччилэр үүнэр көлүөнэни ситиһиилээхтик иитэ, айымньылаахтык үөрэтэ  сылдьаллар.

         Улууспут ыччаты иитиигэ-үөрэтиигэ биир ытык-мааны үөрэҕин кыһатыгар инникитин да маннык уустук, эппиэттээх эйгэҕэ сөҕүөрбэт төлөннөөх үтүө түмүктээх үлэни, кэм эридьиэстээх кэрдиистэрин сиэрдээхтик туоруурга ситиһиилэри баҕарабыт. Кэлэр өттүгэр өссө да аҕам саастаах үөрэнээччилэрэ үөрүүлээх күннэргэ тоҕуоруһан кэлэн олохторун ситиһиитин кэпсээн аастыннар. Ол үллэр үйэлэргэ хатылана туруохтун! Оскуола анала – оннук! “Ииппит – иэстээх” диэн – кырдьык.

 

Уруй-туску! Айхал-мичил!

 

 

 

 

 

 

 

 

 

 

Ытыктабыллаах

_________________!

 

Биһиги нэһилиэкпит олохтоохторун итэҕэлин ылан, эн ___ сыл үтүө суобастаахтык нэһилиэкпит аҕа баһылыгынан үлэлээтиҥ. Бу улахан эппиэтинэстээх үлэҕэ Эн бар дьоҥҥун кытта биир санаанан салайтаран, нэһилиэк сайдыытын туһа диэн бары кыаххын, санааҕын ууран туран үлэлээҥҥин үтүө өйдөбүлү хааллардыҥ. Киһи быһыытынан тус хаачыстыбаҕын эмиэ дьонуҥ-сэргэҥ сыаналыыр. Мантан тэптэрэн эн биир дойдулаахтарыҥ санааларын истэн, толкуйдарын түмэн, өссө өрө көтөн, күүстээх үлэҕэ дойду сайдыытын туһугар үлэҥ-хамнаһыҥ үрүлүйдүн, кэрэ кэскил түстэннин!

 

Эн нэһилиэкпит сайдыытыгар ситиһиигин үрдүктүк сыаналаан туран, улахантан улаханы, улуукантан улууну, умуллубат уоту, уҕараабат уоҕу баҕарабыт. Күн-дьыл өксүөнүн билиммэккэ, эдэрдии эрчимнээхтик, сэргэхтик туттан-хаптан, чугас дьонуҥ сылаас тапталынан кынаттанан, мэлдьи үөрэ-көтө сырыт! Чэгиэн-чэбдик бэйэлээх, үөрүү-көтүү эҥээрдээх, дьол-соргу тулалаах ылсыбыккын ыпсара, туппуккун тупсара сырыт диэн алҕаатахпыт буоллун!

Үөрүү-көтүү өрөгөйдөн, дьол-соргу кынаттан!

 

 

2020 сыл

 

 

 

 

 

 

 

 

 

 

 

 

 

 

      Күндү бииргэ үлэлиир кэллиэгэбитин, Саха Өрөспүүбүлүкэтин үөрэҕириитин туйгунун, үрдүкү таһымнаах чэрчиэнньэ, уруһуй, үлэ учууталын, маастар-педагог ___________________________ профессиональнай бырааһынньыкпытынан уонна учуутал идэтин баһылаан үүнэр көлүөнэни иитиигэ-үөрэтиигэ ____ сыл эҥкилэ суох үлэлээбиккинэн ис сүрэхпититтэн эҕэрдэлиибит!

 

Ытыктабыллаах  ___________________!

 

        Эн бу сыллар усталарыгар талбыт идэҕэр бэриниилээхтик үлэлээбитиҥ, элбэх көлүөнэ ыччакка төрөөбүт сахабыт норуотун биир ураты бэлиэтин: кэрэни кэрэхсиири, саталлаах буолары иҥэрбитиҥ, норуот талба талаана, уран толкуйа, уус майгыта көлүөнэттэн көлүөнэҕэ бэриллэригэр үгүс сыраҕын уурбутуҥ, маастар-педагог үрдүк аатын ылары ситиспитиҥ. Иитэн-үөрэтэн таһаарбыт ыччаттарыҥ Өрөспүүбүлүкэҕэ үлэ араас эйгэтигэр ситиһиилээхтик үлэлии-хамсыы сылдьаллар.

        Эн биһиэхэ тус олоххунан, үлэҕинэн, билиигинэн-көрүүгүнэн, сахалыы сайаҕас санааҕынан, киэҥ-холку майгыгынан, мындыр сүбэҕинэн холобур буолаҕын.

__________________________! Кырдьары-ыалдьары билиммэккэ дьиэ кэргэниҥ, аймах-билэ дьонуҥ тапталларынан угуттанан, дьоллоохтук олор. Кинилэргэ эрэллээх эркин, тулхадыйбат тулааһын буолан мэлдьи үөрдэ сырыт диэн алгыспытын аныыбыт!

 

 

Оскуола кэллэктиибэ

2011 сыл алтынньы 7 күнэ

 

 

 

 

СӨ физическэй култууратын уонна успуордун үтүөлээх үлэһитэ,

СӨ үөрэҕириитин туйгуна,

СӨ физическэй култууратын уонна успуордун туйгуна,

СӨ «Учууталлар учууталлара» аат хаһаайына

 

Ытыктабыллаах ___________________!

 

 

Эйиэхэ 70 сааскын туолар дьоро түгэҥҥинэн ис сүрэхтэн тахсар итии-истиҥ тыллардаах эҕэрдэ этэбит! Учуутал, тириэньэр идэтин баһылаабыт сыралаах үлэҥ үрдүктүк сыаналанарынан үөрэммит оскуолаҥ кэллэктиибэ, төрөөбүт нэһилиэгиҥ бар дьоно киэн туттабыт!

Үгүс сыллаах үлэҥ-хамнаһыҥ үтүө түмүгэ – үөрэппит ыччаккар. Физкультура салаатын талан үөрэнэр элбэх оҕо Эн такайыыгынан өрөгөй үрдүк чыпчаалыгар таҕыста. Эн идэҕин салҕаан, учуутал, тириэньэр үрдүк аатын ылан, Эйигин кытта тэҥҥэ  үлэлии-хамсыы, айа-тута сылдьаллар, салгыы да үөрэниэхтэрэ. Үлэҕэр сатабылгын, дьүккүөргүн үрдүктүк сыаналыыбыт.

Сүрэххин-санааҕын ууран оҕолору успуорт араас көрүҥнэригэр уһуйа-такайа сылдьаргар баҕарабыт. Күн-дьыл көмүс утахтарын күөрэччи көтөҕөн, үйэлэр үрдүк мөҥүөннэрин арҕастарын устун тохтообокко, уоскуйбакка, көтөн-дайан ис.

Чэгиэн-чэбдик доруобуйалаах, үөрүү-көтүү эҥээрдээх дьиэ кэргэҥҥэр күн сырдыга угуттуу сыдьаайдын, дьол-соргу күөрэгэй чыычааҕа ырыанан чугдаардын,  ылбыккын ыпсара, туппуккун тупсара сырыт диэн алҕаатахпыт буоллун!

 

 

_________________________ орто оскуолатын кэллэктиибэ

 

 

 

 

 

______________________________________ орто оскуолата

 

Биир идэлээхпитин, үөрэммит оскуолаҕар учууталынан, оскуола дириэктэринэн өр сылларга айымньылаахтык, үрдүк таһаарыылаахтык үлэлээбит, ытыктабыллаах  ___________________________________ 75 сааскын туолар өрөгөйдөөх үбүлүөйгүнэн итиитик-истиҥник эҕэрдэлиибит!

 

Ытыктабыллаах ________________!

 

         Үлэлээн, олорон кэлбит олоҕуҥ бу кэрчик лоскуйун барытын төрөөбүт-үөскээбит ______________ нэһилиэгэ, үөрэммит оскуолаҥ сайдарын туһугар анааҥҥын, дьон-сэргэ убаастабылын ыллыҥ. Үлэлээбит кэрдиис кэмнэриҥ тухары элбэх оҕону үчүгэйи-куһаҕаны араарарга, дьоҥҥо сайаҕас, кыһамньылаах буоларга иитэн олоххо суолларын булалларыгар көмөлөстүҥ, ол иһин үөрэппит оҕолоруҥ барҕа махталларын Эйиэхэ тиэрдэллэр. Эн үөрэнээччилэриҥ Өрөспүүбүлүкэ араас муннуктарыгар сөбүлүүр идэлэрин баһылаан олох инники күөнүгэр үлэлии-хамсыы сылдьаллар. Эн баай көрүүгүнэн, дириҥ билиигинэн, дьоҥҥор-сэргэҕэр истиҥ сыһыаҥҥынан, эйэҕэс майгыгынан биһиэхэ барыбытыгар үтүө холобур буолаҕын!

         Күн-дьыл көмүс утахтарын күөрэччи көтөҕөн үйэлэр үрдүк мөҥүөннэрин арҕастарын устун тохтообокко, уоскуйбакка, көтөн-дайан ис. Күн сырдыга угуттуу сыдьаайдын, дьол-соргу күөрэгэй чыычааҕа ырыанан чугдаардын,  өссө да уһун сылларга чэгиэн-чэбдик сылдьан, дьоллоохтук, доруобайдык олороргор баҕарабыт  диэн алҕаатахпыт буоллун!

 

Ылсыбытыҥ барыта ыпсан,

Баҕарбытыҥ барыта барҕаран,

Үөрүү-көтүү үктэллэн!

Дьол-соргу олбохтон!

Саргы-дьаалы кынаттан!

 

 

__________________ оскуолатын кэллэктиибэ