Сценарий на день учителя

Учуутал күнүгэр аналлаах концерт сценарийа (ыыталлар Ньургун уонна Сардаана)

1.Ньургун:

Учуутал олоҕун ситимэ – оскуола

Хас уруок – кини үлэтин түмүгэ,

Олоҕун күннээҕи түбүгэ

Үтүө киэһэнэн биһиги оҕолорбутун наука араас эйгэтин биллэрэн уһуйар, угуйар, сырдыкка – кэрэҕэ сирдиир учууталлар!

2 Сардаана: Убаастабыллаах учууталларбытын бу профессиональнай бырааһынньыккытынан – Учуутал күнүнэн итиитик – истиҥник эҕэрдэлиибит!

Тылы биэрэбит оскуолабыт директорыгар Габышев Василий Мартыновичка.

1 Ньургун - Сардаана, эн өйдүүгүн да, биһиги бастакы учууталбыт Галина Петровна маҥнайгы кылааска биһигини сиэтэн киллэрбитин? (ахта саныыр курдук туттар)

2 Сардаана – Өйдөөн бөҕө буо, маҥнайгы кылааска киирэн, үөрэнээччи буолбуппутуттан үөрүү бөҕө буолбуппут дии! Кыра кылааска үөрэнэ сылдьан үчүгэй да этэ дии... (астынар)

1 Ньургун:

 Күндү учууталлар, бу үөрүүлээх бырааһынньыкка  иккис кылаас оҕолоро эһиэхэ “Чуораанчык» диэн ырыаны бэлэхтииллэр.

2 Сардаана:

Учуутал! Хас биирдии киһи учуутал билиититтэн кынат үүннэрэн олох киэҥ аартыгар үктэнэр. Учуутал баар буолан, алыптаах музыка эйгэтигэр, уустук ахсаан суотугар, төрөөбүт төрүт тыл умсулҕаныгар биһиги эттиин – хаанныын уһуйуллабыт, уйдарабыт.

1.Ньургун:

Учуутал, учуутал барахсан,

Уруокка өрүүтүн кыһаллан,

Чуолкайдык быһааран биэрэргин,

Чуумпуран олорон истэбин.

Учуутал, учуутал барахсан,

Үөрэтэр, уһуйар дьарыктаах

Убаастыыр киһибитин –

Эйиигин ийэҕэ тэҥниибит!

Эһигини эҕэрдэлииллэр үһүс кылаас үөрэнээччилэрэ...( 3 кылаастар тахсаллар)

2 Сардаана:

Учуутал эйиэхэ

Эҕэрдэ этэбит,

Киэн тута, махтана,

Бэлэх уунабыт.

.1 Ньургун:

Учуутал алыптаах мичээрэ

Үгүс дьон сүрэҕэр уйалан,

Учуутал алыптаах идэтэ

Үйэттэн-үйэҕэ уруйдан!

Бэйэлэрин итии - истиҥ эҕэрдэлэрин, биһиги тапталлаах учууталларбытыгар төрдүс кылаас үөрэнээччилэрэ тиэрдэллэр ( 4 кылаастар тахсаллар)

2 Сардаана: 

Үрдүккэ, сырдыкка көтүтэр,

Үтүөнү- кэрэни үксэтэр

Үтүөкэн киһибит учуутал

Үйэ саас эйиэхэ дьиҥ махтал!

Эҕэрдэлииллэр алтыс кылаас үөрэнээччилэрэ( 6 кылаастар тахсаллар- ырыа)

1.Ньургун:

Сайаҕас учуутал барахсан

Саргылаах билиини биэрэҕин

Сандаарар саҕаҕы арыйан

Сулустаах суолбутун тэлэҕин.

Сыанаҕа көрсүөххэйиҥ ахсыс кылаас үөрэнээччилэрин ( 8 кылаастар тахсаллар- үҥкүү)

2. Сардаана: 

Учуутал эн өрүү

Уот сулус буолаҥҥын,

Кэрэҕэ, сырдыкка

Угуйа тураҕын!

Убаастабыллаах учууталларбыт, эһиэхэ эрэ анаан, бу махталлаах бырааһынньыкка көрдөөх сценка. Эҕэрдэлииллэр онус кылаас үөрэнээччилэрэ. ( 10 кылаастар тахсаллар- сценка)

1.Ньургун:

Учуутал эн -

Маҥнайгы чугдаарар чуораанныын

Мындыр өй суолугар сирдиигин,

Саҕахтан сапсынар сарыаллыын

Сандаарар сырдыкка илдьэҕин!

Эҕэрдэлээх ырыалаах эһиэхэ эрэ, биһиги күнду учууталларбыт кэллилэр бэһис кылаас үөрэнээччилэрэ. ( 5 кылаастар тахсаллар - ырыа)

2. Сардаана: 

О5о саас умсулҕан иэйиитин

Оһуордаах олугун уураҕын,

Төрөөбут дойдубут кэскилин

Төлкөлөөх түөрэҕин түстүүгүн.

Көрсүҥ, эҕэрдэ номер сэттис кылаастартан (7 кылаастар тахсаллар - үҥкүү)

1.Ньургун:

Уруйдан, айхаллан учуутал-

Умсугута уһуйар аанньал

Эйиэхэ этиллэр дьин таптал,

Эдэртэн, кырдьаҕастан махтал!

Күндү учууталлар, эһиэхэ махталбыт муҥура суох. Оскуола выпускниктарыттан эһиэхэ эйэҕэс эҕэрдэ. (11 кылаастар тахсаллар - ырыа)

2. Сардаана – Дьэ,  кырдьык даҕаны оҕолорбут наһаа да ырыаһыттар, үҥкүүһүттэр эбит дии...

1.Ньургун – Оннук – оннук, сөпкө этэҕин. Билигин сыанаҕа көрсүөҕүҥ уоттаах – күөстээх эҕэрдэ нүөмэрдээх 9 кылаас үөрэнээччилэрин. (9 кылаастар тахсаллар – үҥкүү)

1.Ньургун:

Үөрэнээччилэрин махталларынан,

О5олорун ситиһиилэринэн,

Бар – дьонун үөруулэринэн кынаттанан

Өссө да уһуннук улэлээн,

Уолбат уйгуланын, уостубат олохтонуҥ! диэн туран бу үҥкүүнү күндү учууталларбытыгар бэлэхтиирбитин көҥүллээҥ. (Актив школы – үҥкүү)

2. Сардаана: Утуйар ууларын умнан туран, үөрэх абылаҥар оҕолору уһуйар, убаастабыллаах учууталлар!

1.Ньургун:

Эһигини бука барыгытын бырааһынньыккытынан ис сурэхтэн долгуйан туран эҕэрдэлиибит! Үлэҕитигэр үрдүктэн үрдүк ситиһиилэри, кытаанах доруобуйаны, элбэх – элбэх үөрүүнү, дьолу баҕарабыт!

Күн кэрэ киһиэхэ

Учуутал, эйиэхэ

Үөрэтэр утүөҕэр

Махталбыт хаһан да бараммат буолуоҕа! диэн алгыс тылынан бүгүҥҥү Учуутал күнүгэр аналлаах эҕэрдэ кэнсиэрбитин түмүктүүбүт.