Сценарий к празднику: "Яран-Сувар"

Муниципальное казенное дошкольное общеобразовательное учреждение

«Детский сад «Улыбка»

« Яран сувар»

                                          Гьазурайди:   Сефервлиева С.М.

                                            2021 год

Ведущий:  Ассаламу алейкум, азиз дустар, мугьманар,

Мубаракрай квез виридаз шад яран сувар.

Чандин сагъвал, ислягь уьмуьр хьурай квез.

Сад Аллагьди девлетарни, гьуьрметарни гурай квез.

Ведущая: Дуьнья ислягь хьуй гьамиша чилерал.

Шад межлисар хьуй гьамиша к1валера.

Шадвал ая, кьуьлер ая, лагь тостар.

Уьмуьрда шад хьурай куьн, чи дустар.

Ведущий: Чна гьар йисуз къаршиламишзавай ва шаддиз кьиле тухузвай, чи халкьдин виридалайни багьа ва рикI алай гуьзел суварикай сад  «Яран сувар» я. И шад сувар чаз кьуьд куьтягь хьунин ва гатфар вичин къуватда гьатунин гьакъиндай муштулух гваз къвезвай сувар я. Им , чилин чинлай хъуьтIуьн лацу яргъан алатна, гатфарин къацу махпур экIя жезвай мублагь ва гуьлуьшан вахт я.

Ведущая: Т1ебиат уях жезвай, пепе-шепедал чан хквезвай, гатфарин югъни-йиф барамбар жезвай и югъ гьакъикъатда  лишанлуди я. Им халкьариз дуьньяда ислягьвал, уьлквейрин арада хуш рафтарвал хуьниз эвергунин лишан я. Им чилел кIвалахзавай гьар сад патал къизгъин вахт я. Чун гьар сад, гьар са йикъакай менфят къачуз, гатфарин кIвалахар галай-галайвал кьиле тухуз чалишмиш хьана кIанда.

Ваз хвашкалди, яран сувар, Салам гана мугьман хьайи.

Гатфарикай мани лугьур, Чубарукриз баян хьайи.

Дуствал, садвал гъалиб хьана, шадвал хьурай хуьре, к1вале.

Берекатар артух хьана, мублагь хьурай вири уьлкве.

Яран сувар-азиз сувар, берекат гъваш ник1ериз чи.

Яран паяр, хунчаяр гвай, хуш я лап вун рик1ериз чи.

Ведущий: Гила чна гаф гузва школадин директор Мурадалиева Наида Магамедхановнадиз.

Ведущий: Гаф гузма амай муаллимриз.

Ведущий:  Яран сувариз аялар ва жегьилар хуьре ну-нуяр ийиз къекъведа. К1валин иесиди вичихъ авай к1ерец, шуьмягъ, кака ва маса зат1-мат1 чантадиз вегьеда. Рушари мукьва-кьилийриз, къуншийриз къапара аваз хуьрекар тухуда. Яран сувариз чахъ чи халкьдин адетрихъ галаз алакъалу хуьрекар ава. Месела: афарар, гит1, т1ач, хъчадин пич1екар, пахлаваяр, цик1енар, натIуфа, иситIа, шуьреяр ва масабур.

Ведущая: Жегьилри гъенерал ц1аяр хъийида ва абурулай хкадарда, ц1аялай хкадарайла  квай азарар ц1у куда ва уьмуьр яргъи жеда  лугьуда. Аялрин гъилерихъ сун яру гъалунин гьалкъаяр акалда, яра яна ч1улав тахьурай лугьуз. Тфенгар яда, яран йифиз к1вале ац1ай патрум тун хъсан кар яз гьисабдач.

Самира: Булдиз хьурай квехъ къуьлерин бегьер,

Зуьрнейрин ванер алаз хьуй к1валер.

Рик1ер ац1урай экуь мурадрив,

К1вализ чей чанта - яран паярив,

Хкадра ц1аярилай: куй гунагь, азар,

Кьабулрай  Сад Аллагьди куь яран паяр.

Хадижа:  Синийрал алаз пич1екни афар,

Майдандал экъеч1, гуьзел тир рушар.

К1ват1 хьухь гъенерал мукьвабур, дустар,

Авазар, ц1ай гваз кьабула гатфар.

Тамир ац1ай патрумар, тфенгдал илиг,

Фирай уьмуьр ислягьдиз , азаддиз вилик.

                        ( Мани « Яран сувар»)

Рамазан: Гуьзел йикъар, чими ракъар,

Къе гатфари гъанва чаз.

Нур къизилдин, ван билбилдин,

Т1ебиатди ганва чаз!

 Беневшаяр, гъвергъвер цуьквер

Экъеч1зава чуьллера.

Маддурнаяр, ч1имч1ир нуьк1вер

Лув гуз ала кьилерал!

Кьезил гарар, куьлуь марфар

Гатфари чаз къурзава.

Чилин бегьер, рик1ин эквер

Берекатрив гурзава!

Милара: Амач хъуьт1уьн къайни аяз,

Яр атана муштулух гваз.

Гатфарин чиг, шавгьар галаз,

Яран йифер мугьман я чаз.

Ялаврик шад къвезва дустар,

Гъиле кьуна яргъи тазар,

Берби ягъиз жедан бизар,

Чан гуьлуьшан яран сувар.

Хидирнаби:  Яран сувар – азиз сувар,

Берекат гъваш ник1ериз чи.

Яран паяр, хунчаяр гвай,

Хуш я вун лап рик1ериз чи!

Эльвира: Гур межлисдин йикъар гваз,

Экуь , нурлу йикъар гваз,

Беневшаяр, ц1аяр гваз,

Яран сувар атана.

Ч1имч1ир рахаз кьилерал,

Зегьмет къугъваз гъилерал,

Берекат гваз чилерал,

Яран сувар атана.

                              ( Мани « Мегьри чан»)

Ведущий:  Мубарак хьуй квез Яран сувар, 

Мубарак хьуй квез Яран йифер,

Гьар са лезгидик акатрай лувар,

Чун лезги халкь я лацу лифер.

 Ша кутван, лезгияр, Яран ц1аяр,

Ша, лезгияр ,к1вализ мугьмандиз,

Чи гьар са лезгидиз жагъурай яр,

Тахьурай са лезгини пашмандиз.

 
Ведущая: Мубарак хьуй квез чими йикъар,

Квез мани лугьуз хьурай нуьк1ер,

Гьич такурай лезгийриз накъвар,

Т1ар тахьурай лезгийрин рик1ер.

 Ша, к1ват1ин чна Яран сувариз,

Мукьва-кьилиярни, к1еви дустар,

Ша элкъвен Аллагьдихъ цавариз,

Т1алабиз рик1евай вири къастар.

Чухсагъул яб гунай!