Урок по родной литературе на тему: "Путешествие по сказкам"

     Дарсла тема:
«Наб дигулра нешла мезличила лерилра дагьес»

 Дарсла мурад:
1. Дурхlнала нешла мезличи диги адикьни;
2. Лукlни ва дучlни гьаладяхl ардукни;
3. Дурхlни пикрибикlахъес  бурсибарни;
4. Гьаларти классуназиб белчlунси материал гьанбикахъни, ил        имцlабикlахъни ва дебабиахъни;
5. Гъай гъаладяхl ардукни.

 Чебаъла ваяхl:
Таблицаби, карточкаби, сигнальный карточкаби, жузи, интерактивная доска.

 

Дарсла башри: ( 1 слайд)

1. Дурхlни дарсличи хlядурбарни.

2. Учительла вступительный гъай:

Салам хlушаб дакlибтас,иш нушала дарсличи.

Гlурра халаси салам, хlушаб биштlати дурхlнас!

 

Дурхlни: Салам!

Учитель: Ишбархlила дарсличиб кьасбирехlе нушани,гьаннала уб касибси лебил пагь чебаахъес ва тикрарбарес!

(2 слайд)

Касахlелли К.Д.Ушинскийла гъай   «Нешла мез вегI варкьибси нешгъунти сари: илди  хIейгни вегIла неш хIейгнигъуна саби»,иличибли бурес дирехlе,нешла мез гьариллис дурхъати сарни,сенахlенну илдачил сай дурхlя бегl гьалав гъайикlес вехlирхьуси,илдачил сари виштlаси дурхlяла бекlлизир цаибти пикруми алкlути, илдала кумекличил саби гlямрула халаси гьунилис бехlбихьуд кабирхьуси.

3.Делчlунти тикрадарни.

Учитель: Дурхlни,гьанбиркахъехlе, се саби предложение.

Дурхlни: Таманси  пикри иргъахъуси дугьбала цалабяхълис предложение  или бикlар.

Учитель: Пикри,тилади, буйрухъ,уркlила хlялани нушани     предложениебачирли иргъути сари . Предложениели, гlядатли биуби, таманси пикри иргъахъу.

(Дурхlнази пикридирахъулра предложениеби)

(3 слайд)

-Таманси пикри аргъахъес асубирар ца девлира, кlел девлира:

Садаиб гlебшни. Шаладикиб.

-Хlебиалли, илдира предложениеби сари.

-Дурхlни, гьанбикахъая гьари, иргъахъуси мягlна хlясибли сегъунти журнала дирара предложениеби?

(4слайд)

1.Гlебшни садаили сари. Аргъ бугlярбикlули саби (хабарла)

2.Хала неш ,иш нушала ши мурт акlубси? (суал)

3.Арали бираб нушала  ахlерси Ватlан! (вяв)

 

4.Сагаси дарс бурни.

Учитель: (5 слайд)

-Хlерая доскаличи, ишди предложениебачи:

Рурси ракlиб.

Рурсили дурсри дариб.

 

-Селичирли декlардулхъули ишди предложениеби? (дурхlнала пикри)

Учитель: Ишбархlи нуша дарсличир гъайдикlехlе предложениела бекl члентачила.

-Ишбархlила нушала дарсла тема саби «Предложениела бекl членти»

Предложениела членти чула даража хlясибли кlел кьукьяличи дуртlути сари:

 бекl члентачи ва  кlиибил даражала члентачи.

Дарган мезла предложениелизир хlябал бекl член  лерти сари:

подлежащее, сказуемое ва объект.

(6слайд)

Дарган мезла цацадехl предложениеби делши дирар кlел бекl членна хьулчиличи : подлежащееличи ва сказуемоеличи, цархlилти хlябал бекl членна хьулчиличи: подлежащееличи, сказуемоеличи ва объектличи.

Предложение хlябал бекl членничи белши бируси саби,эгер подлежащее иргъахъуси дев актив падежла формализиб гили биалли. Илгъуна предложениелизиб объект уйхъу падежла формализиб гили бирар. Предложение кlел бекl членничи белши бирар ,эгер подлежащее иргъахъуси дев уйхъу падежла формализиб бакlили биалли.Илгъуна предложениелизиб объект бируси ахlен.

Масала:   а) Берхlи гьаббакlиб.

                     Хя гъямбикlули саби.

                     Дурзам гlяйбиуб.

                 б) Берхlили дубурти шаладариб.

                     Нуни хя лявбарира.

                     Букlуй дурзам дубурличи гьайбариб.

Цаибил кьукьялизирти предложениебазир кlикlел бекl членцун сари лерти: подлежащее ва сказуемое.

Кlиибил кьукьялизирти предложениебазир биалли хlяб-хlябал бекl член лер: подлежащее ,сказуемое ва объект.

(Подлежащеелизибад баркьуди дурабулхъули саби,объектличи баркьуди чеббурхули саби)

(7 слайд)

Подлежащее – предложениела бекl член саби,суненира баркьуди чизибад яра селизибад кабиркулил,саби сегъуна сабил яра сегъуна хlяйчиб сабил , чебиахъуси.

Подлежащеели чи? се? ва чили? сели? ибти суалтала цалис жаваб луга.

                  Нешли кьацl дариб.          Дурхlя висули сай.

(8 слайд)

Сказуемое – предложениела бекl член саби,суненира подлежащеелизибад кабиркуси баркьуди,иличибси хlял яра илала лишан чебиахъуси.

Сказуемоеличи секlай се бирули? секlал се хlяйчиб саби? ибти суалтала ца кабатес вирар.

                  Нешли кьацl дариб.

 (9 слайд)

Объект саби ,суненира ,баркьуди чичи яра селичи чеббурхулил,чебиахъуси. Объект мурталра уйхъу падежлизиб башар.

 Объектли чи? се? ибти суалтала цалис жаваб луга.

                 Нешли кьацl дариб.

 

5. Дарсла тема кагахъни.    (10 слайд)

           Творческий хlянчи.

Учитель: Кlунтlрала мерличиб дев имцlабирули ,текст чеббелкlеная.

1) ……….  урчи дуцlбариб.

2)Учительли наб дневниклизи «шула»……….  .

3)Нуни нешлис ………. пешкешбирис.

4)Виштlаси ……… сирилав висули сай.

5)Нешли уршилис тап ………. .

6)Дягlли ………. гьакlдикlахъули сари.

(Хlянчи белкlи гlергъи ,подлежащее ,сказуемое ва объект уди тугъаахъили декlардирахъулра)

6.Разминка.      (11 слайд)

Учитель: Гьанна белгибирехlе,чи саял хlушазивад бегlлара дахъал далуси ва пикриикlес балуси.Ил мурадли нуни хlушази суалти хьардиис,хlушани биалли илдас жавабти даргая. 

1)Мазала дирар се?  (бала)

2)Кьялубар бирар се?  (галга)

3)Мирхъили биру се?  (варъа)

4)Савли дурхlнани диру се?  (зарядка)

5)Галгубар бирар се?  (вацlа)

6)Галгаличиб гlяшси бирар се?  (кьада)

7)Хъяб хьанцlа бирар се?  (лагьа)

8)Хlеб хили башар …..  (чатlа)

9)Цугбикибсилис луга …..  (салам)

10)Гъагултала нургъби сари се?  (заб)

11)Узес хlейгусилис чи бикlара?  (азгъин)

12)Адамлис бегlлара гlягlниси се саби?  (арадеш)

7.Карточкабачил хlянчи.

(Дурхlнас учительли дуртlули сари карточкаби,чузирра жура-журала заданиеби лерти)

-дурхlнани карочкабазибси хlянчи бирули саби ва чула фамилияби ва у делкlи учительлизи дедлугули сари.

-учительли илди ахтардидирули сари ва кьиматуни кадалтули сари.

8. Тест.    (12 слайд)

 

1.Предложениела жураби сари:

      А) подлежащее, сказуемое, объект

      В) хабарла, суалла, вявла

      С) существит., глагол, прилагат.      

2.Предложение саби:

    А) Устали мургьила тlулека бариб.

    В) Халаси анхъ.

    С) Къалабахlейкlули  узен.

3.Ишди предложениебазибад хабар предложение декlарбарес:

    А) Патlимат, неш чинар сари?

    В) Агь, хlябилра гlяхlси барилри!

    С) Виштlаси дурхlя висули сай.

4.Предложениела бекl членти сари:

    А) подлежащее, сказумое, объект.

    В) определение, дополнение, обстоятельство.

    С) прилаг., существит., глагол.

 5.Бархьли подлежащее къелаибси предложение декlарбарая:

    А) Берхlи гьаббакlиб.

    В) Мурадли узичи кагъар белкlун.

    С) Юртла мякьлаб машина тlашлири.

 6.Подлежащеели сегъуна суайс жаваб луга:

    А) се бирули? се бариба?

    В) сегъуна? чиди?

    С) чи? се? чили? сели?

 7.Объект лебси предложение декlарбарая:

    А) Бугlярбиуб.

    В) Нешли  хlева асиб.

    С) Вацlа шинишбиуб.

8.Чиди предложениелизи балбиркура сказуемое «бариб»?

    А) Вацlализир  нушани  гlярми   ……..

    В) Нуни  дарсличиб «шула»  ……..

    С) Чатlани  бурханиб  пукьа  ………

9.Подлежащее,сказуемое ва объект лерси предложениела разбор декlарбарая:

10.Предложениелизиб имцlаливан сказуемое сегъуна гъайла бутlали башара:

     А) существительноели

     В) глаголли

     С) прилагательноели

 

-тестла анализ барес,  духути дурхlни декlарбарес.

 

9.Дарсла итог. Рефлексия.

-дарсличиб бузути дурхlни гапбарес ва кьиматуни кадатес.

 

10.Хъули хlянчи бедни.

-хъулир 3 предложение пикридарес,чузирра хlябал бекl членти лерти.