Եռանկյան մակերես դասի պլան

Բ Ա Ց   Դ Ա Ս Ի   Պ Լ Ա Ն

Համագործակցային  դաս` համակարգչային  տեխնիկայի  կիրառմամբ

Ուսուցիչ՝             Նարինե Բաղրամյան                                                                                                                   

Ամսաթիվը՝         07.04.2022 թ.                                                                                                     

Առարկան՝           երկրաչափություն                                                                                                       

Դասարանը՝        8-րդ   

Դասի  թեման՝    Եռանկյան  մակերեսը

Դասի  բնույթը՝    նոր  նյութի հաղորդման  դաս 

Դասի  նպատակը՝ 

÷       խորացնել  եռանկյան,  նրա  միջնագծի  ու  բարձրության, ուղղանկյուն  եռանկյան  և  նրա  հատկությունների,  ինչպես  նաև  զուգահեռագծի  հատկությունների  և  մակերեսի  հաշվման   մասին   ձեռք  բերած  գիտելիքները,

÷       արտածել  եռանկյան  մակերեսը  հաշվելու  բանաձևը,  

÷       ուսումնասիրել  մեկական  հավասար  անկյուն  ունեցող  եռանկյունների  մակերեսների  հարաբերությունը,  

÷       զարգացնել   վերլուծություններ  և  ընդհանրացումներ  կատարելու  կարողություններ  և  գծապատկերման  հմտություններ,

÷       ձևավորել  խնդիրներ  լուծելիս   զուգահեռագծի  և  եռանկյան  մակերեսների  հաշվման  բանաձևերը  կիրառելու  կարողություններ,   

÷       մեծացնել  հետաքրքրությունն  առարկայի  նկատմամբ:

Սովորողի  ուսումնական  ակնկալիքները՝ 

      Գիտենալ  եռանկյան  մակերեսի  մասին  թեորեմը  և դրա  ապացույցը: 

      Իմանալ  եռանկյան  մակերեսի  մասին  թեորեմի  երկու  հետևանքները,  ինչպես  նաև  մեկական  հավասար  անկյուն  ունեցող եռանկյունների  մակերեսների  հարաբերության  մասին  թեորեմը:

      Կարողանալ   արտածել  եռանկյան  մակերեսի  հաշվման  բանաձևը  և  այն  կիրառել   խնդիրներ  լուծելիս:

Դասի  կահավորումը՝  

Ø համակարգիչ,  պրոյեկտոր  և  մեծ  էկրան  և  այլ  անհրաժեշտ  պարագաներ: 

Դասի  ընթացքը.

1.      Բանավոր  հարցում 

2.      Նոր  նյութի  հաղորդում

3.      Դասի  ամփոփում  

4.      Խնդիրների  լուծում   

5.      Տնային  աշխատանքի  հանձնարարում  և գնահատում 

      Դ Ա Ս Ի    Ը Ն Թ Ա Ց Ք Ի      Ն Կ Ա Ր Ա Գ Ր ՈՒ Թ Յ ՈՒ Ն Ը

1. ԲԱՆԱՎՈՐ  ՀԱՐՑՈՒՄ 

( 7-8 րդ  սլայդներ)

      Էկրանին  հերթով  բացվում  են  հարցեր,  որոնց  պատասխանները  հնարավորություն  են  տալիս  կրկնել  և  ընդհանրացնել  արդեն  ունեցած  այն  գիտելիքները,  որոնք  անհրաժեշտ  են  նոր  նյութը  յուրացնելու  համար:  Հարցերը  հետևյալն  են՝

Ø Ձեվակերպել բազմանկյունների մակերեսների հիմնական հատկությունները

Ø Ինչպե՞ս են հաշվում ուղղանկյան մակերեսը Ø Ինչպե՞ս են հաշվում զուգահեռագծի մակերեսը

Ø Ո՞ր բազմանկյունն  է կոչվում եռանկյուն:

Ø Ի՞նչն  է  կոչվում    եռանկյան    բարձրություն:

Ø Ո՞ր  եռանկյունն  է  կոչվում   ուղղանկյուն  եռանկյուն: 

Ø Ինչպե՞ս   են  կոչվում  ուղղանկյուն  եռանկյան  կողմերը: 

2. ՆՈՐ  ՆՅՈՒԹԻ  ՀԱՂՈՐԴՈՒՄ

(10-15-րդ  սլայդներ)

   Նոր  նյութի  հաղորդումը  ուղեկցվում  է  սլայդների  ցուցադրումով:      10-րդ  սլայդում  մեկնաբանվում  են  եռանկյան  հիմքի  և  բարձրության հասկացությունները  և  ցուցադրվում   է  համապատասխան  գծագիրը: 

   11-րդ  սլայդում  ցուցադրվում  է  եռանկյան  մակերեսի  մասին  թեորեմի  ձևակերպումը  և   նրա  ապացույցը:    

 12-րդ և 13-րդ սլայդներում  ցուցադրվում  են  եռանկյան  մակերեսի  մասին  թեորեմի  երկու  հետևանքների  ձևակերպումները  և   համապատասխան  գծապատկերները:       14-15-րդ  սլայդներում  մեկական  հավասար  անկյուն  ունեցող եռանկյունների  մակերեսների  հարաբերության  մասին  թեորեմի  ձևակերպումն  է  և  ապացույցը:

3. ԴԱՍԻ  ԱՄՓՈՓՈՒՄ

(16-17-րդ  սլայդներ)

       Դասն  ամփոփվում  է ՝ 

1.      Խաղային թեստի միջոցով:

2.      Անփոփիչ հարցերով՝  շարունակելով ձևակերպել նոր դասի նյութը: Հարցերը հետևյալն է . Շարունակի՛ր …

v Զուգահեռագծի մակերեսը հավասար է ․․․ 

v Եռանկյան մակերեսը հավասար է ․․․

v Ուղղանկյուն եռանկյան մակերեսը հավասար է․․․

v Եթե երկու եռանկյունների բարձրությունները հավասար են, ապա ․․․

v Եթե եռանկյուններից մեկի անկյունը հավասար է մյուսի անկյանը, ապա ․․․ 

3. ԽՆԴԻՐՆԵՐԻ   ԼՈՒԾՈՒՄ

(18-20-րդ  սլայդներ)

        Էկրանին  հերթով  ցուցադրվում  են  խնդիրները:  Յուրաքնչյուր  խնդրի  լուծման  համար  աշակերտներին  ժամանակ  է  տրվում:   Սկզբում  նրանք  աշխատում  են  զույգերով,  այնուհետև  իրենց  լուծումները  քննարկում  քառյակներով՝  հարևան  զույգի  հետ,  որից  հետո  միայն  էկրանին  ցուցադրվում  է տվյալ  խնդրի  լուծումը:  Աշակերտները  համեմատում  են  իրենց  լուծման  հետ  և  գրառում  տետրերում:        Խնդիրները  հետևյալն  են.

     Խնդիր 1 . Դիցուք՝  ɑ-ն  եռանկյան  հիմքն  է, ℎ-ը՝  բարձրությունը,  իսկ  S-ը՝  մակերեսը: Գտնել S -ը,  եթե ɑ= 32 սմ, ℎ= 13 սմ: 

   Խնդիր 2. Դիցուք՝  ɑ-ն  եռանկյան  հիմքն  է, ℎ-ը՝  բարձրությունը,  իսկ  S-ը՝  մակերեսը: Գտնել ℎ-ը,  եթե ɑ= 27 սմ,  S= 108 սմ²:  

     Խնդիր 3. ABC  եռանկյան մեջ  ∡A = 30°, AB=14, AC=6: Գտնել եռանկյան մակերեսը: 

    Խնդիր 4. ABC  եռանկյան  AB  և  BC  կողմերը  համապատասխանաբար  16 սմ  և  22 սմ  են: Գտնել BC կողմին տարված բարձրությունը, եթե AB կողմին տարված  բարձրությունը 11 սմ  է:        

Խնդիր 5 . ABC   եռանկյան  մեջ  ∠C = 135°,  AC = 6 դմ,  իսկ  BD  բարձրությունը  2 դմ  է:  Գտեք   ABD   եռանկյան  մակերեսը: 

Լրացուցիչ՝

Խնդիր 6.  ABCD   ուղղանկյան BD  անկյունագիծը 12 սմ  է: B գագաթի հեռավորությունը AC ուղղից  հավասար է 4 սմ:  Գտե՛ք ABC եռանկյան  մակերեսը:

5. ՏՆԱՅԻՆ  ԱՇԽԱՏԱՆՔԻ  ՀԱՆՁՆԱՐԱՐՈՒՄ   ԵՎ  ԳՆԱՀԱՏՈՒՄ                                            

(21-րդ  սլայդ)

      Սովորել     «Եռանկյան  մակերեսը»  դասը (§2. կետ 43),        լուծել   № 329 ա,  331,  332,  333  խնդիրները: 

    Գրականություն

1.      Լ. Ս. Աթանասյան, Վ. Ֆ. Բուտուզով   և  ուրիշներ   «Երկրաչափություն  8»,  «Զանգակ» 2012,  Երևան:

2.      Ս. Է.  Հակոբյան  «Երկրաչափություն  7-9:  Ուսուցչի  ձեռնարկ»,  «Զանգակ-97»,  Երևան  2011:

3.      Մաթեմատիկա:  Հանրակրթական  հիմնական  դպրոցի  առարկայական  չափորոշիչ  և  ծրագիր: