Դասղեկական բաց դաս

Դասղեկական բաց դաս

Հայկական հեռուստաեթերը մեր աչքերով

Մայիսի 15-ին              դպրոցի  էլեկտրոնային գրադարանում 11-րդ իրավագիտական դասարանում տեղի ունեցավ  բաց դաս «Հայկական հեռուստաեթերը մեր աչքերով»  թեմայով: Նպատակն էր` վեր հանել  հեռուստատեսության կարևորությունը, դերը  անհատի  ձևավորման ու դաստիարակության գործում, ինչպես նաև եթերային գայթակղիչ բազմազանության մեջ կարողանալ կողմնորոշվել դեպի այն հաղորդումները, որոնք տարիքային տվյալ խմբի համար  ունեն ճանաչողական և դաստիարակչական նշանակություն:

Դասը սկսվեց ուսուցչի խոսքով. մեկնաբանվեց թեմայի ընտրությունը: Ապա հինգ հետազոտական խմբերի միջև ծավալվեց քննարկումը: Նրանք ընտրել էին եթերային որոշակի ուղղություևներ` մշակույթ, լրատվություն, առողջ ապրելակերպ և սպորտ, սերիալ, թոք շոու: Խմբերը հաջորդաբար ներկայացրին իրենց ուսումնասիրությունը , ապա դիտարկումների արդյունքները:

·         «Մշակութային բաժնի» աշակերտները  ուսումնասիրել են «Հ1»-ի, «Շողակաթի» և «Շանթ TV»-ի գրեթե բոլոր մշակութային հաղորդումները` արձանագրելով հետևյալը.

Ճանաչողական բնույթ են կրում «Հ1»-ի  «Օտար ամայի ճամփեքի վրա», «Հայաստանի ճամփեքով» ,« Երգ երգոց»  նախագծերը: Գեղագիտական ճաշակ ու հոգևոր արժեքներ են հաղորդում «Շողակաթի» և հատկապես «Շանթ TV»-ի  «Պարահանդես», «Պարի́ր, թե կարող ես » ,«Հայ սուպերսթար» ,«Ժողովրդական երգիչ» , «Դուդուկի ընտրյալները» նախագծերը:

Աշակերտների պնդմամբ վերջին երկուսը հայկականությունը շեշտադրող ու ազգային արմատները ներկայացնող նախագծեր են:

Ուսուցիչը հարց ուղղեց  աշակերտներին.

-Ի°նչ մշակութային նախագիծ կստեղծեիք դուք:

Պատասխան.

-«Քյավառ» հեռուստաընկերության եթերում կպատրաստեինք հաղորդում` նվիրված Գավառի առանձնահատուկ կերակրատեսակներին, խոհանոցին ու խոհանոցային առանձնահատկություններին:

·         Հաջորդ բաժինը լրատվականն է: Աշակերտները փաստեցին, որ լրատվական գործունեությունն իրենից ներկայացնում է բավական պատասխանատու և անձնվեր աշխատանք: Քննարկումը ծավալվում է նրանց կողմից ուսումնասիրված մի քանի հեռուստաալիքների լրատվության շրջանակներում. «Հ1» `« Լուրեր» , «Կենտրոն»` «Էպիկենտրոն», «Երկիր մեդիա» ` «Երկիրն այսօր» , «Շանթ» ` «Հորիզոն», «Արմենիա»`  «Ժամը լրատվական» , «Հ2» ` «Լրաբեր»: Լսվեցին հետաքրքիր մանրամասներ, կարծիքներ այդ ծրագրերի օբյեկտիվության, ինֆորմացիայի մատուցման ձևերի, հաղորդավարների հմտության և այլնի մասին: Աշակերտները նշեցին, որ չնայած որոշ վերապահումներին, դրանք հիմնականում արտացոլում են հայկական իրականությունը: Նրանց աչքից չէին  վրիպել որոշ հեռուստաալիքների իշխանամետ կողմնորոշումը և դրանից բխող մեկնաբանությունները:

·         Առողջ ապրելակերպ և սպորտ. խումբը ներկայացրեց առողջ ապրելակերպի մասին իրենց ունեցած պատկերացումները և նշեց հայկական եթերում այդ բնույթի ծրագրերի պակասի մասին: Աշակերտները ուսումնասիրել էին «Մի վնասիր» («Շանթ»), «Ապրիր առողջ» («Կենտրոն»), «Առավոտ լուսո»  («Հ1»), «Հայ մայրիկ» («Երկիր մեդիա»)  բժշկական հաղորդումները: Շեշտը դրվեց «Մի վնասիր» հաղորդման վրա, քանի որ այն հնարավորություն է տալիս մարդկանց ոչ միայն հետևել հաղորդման ընթացքին, այլև անմիջական մասնակցություն ունենալ դրան: Բժշկի գործնականում կատարվող բացատրությունները հնարավորություն են տալիս մարդկանց խորությամբ ընկալել երևույթը և անել օգտակար հետևություններ:

Այնուհետև աշակերտները հետևելով վերը նշված սկզբունքին, ուսուցիչներին առաջարկեցին հայ մասնագետների կողմից մշակված Սննդի բուրգը: Առաջադրանքը հետևյալում էր. բուրգի մեջ ըստ կարևորության դասավորել այն մթերքները, որոնք անհրաժեշտ են մեր օրգանիզմին օրվա ընթացքում: Նույն առաջադրանքը տրվեց նաև աշակերտներին: Աշխատանքն ավարտելուց հետո համեմատվեցին ուսուցիչների և աշակերտների մոտեցումները, արվեցին պարզաբանումներ (ուսուցիչներն իրենց ակտիվությամբ գերազանցեցին աշակերտներին. խոսեց առողջ ապրելակերպի մասին մեր մանկավարժների ունեցած խորը գիտելիքներն ու տարիների կուտակած փորձը):Իրենց խորհուրդներով ուսուցիչները ճիշտ հղումներ արեցին աշակերտներին` մեկ անգամ ևս ապացուցելով  «Խոսքը` մեծին , ջուրը` փոքրին»  ժողովրդական պարզ ասացվածքը:

Ուսուցիչը հարց ուղղեց խմբին.

-Արդյո°ք առողջ ապրելու համար նախ պետք է  սիրել սեփական «ես»-ը:

Երեխաները ըմբռնեցին հարցի իմաստը … դրական պատասխանը չուշացավ:

Խմբի տղաները իրենց կարճ խոսքում անդրադարձան նաև հայկական սպորտի պատմությանը` չմոռանալով նշել  Արարատ -73- ի փառավոր հաղթանակի մասին, որը խորհրդային մեծ երկրում փոքր ժողովրդի համար ազգային հպարտություն դարձավ:

Եղավ հարցադրում.

-Սպորտայի°ն ազգ ենք մենք, թե` ոչ:

Պատասխան.

-Ավելի շուտ` պասիվ սպորտային. Սիրում ենք դիտել, բայց ոչ զբաղվել դրանով:

·         Բուռն ու օգտակար քննարկումն ավարտվեց, էստաֆետը փոխանցվեց սերիալները ներկայացնող խմբին: Հետազոտման նյութը առավել, քան առատ էր:Աշակերտները միաբերան փաստեցին. կարիք չկա դառնալ սերիալների գերին, իսկ դիտելու դեպքում` վերցնել օգտակարն ու ուսանելին:

Թերևս ամենաուշագրավը հենց աշակերտների կողմից քաղաքի բնակիչների շրջանում արված հարցումն էր , թե ինչ կարծիք ունեն մարդիկ «սերիալ» երևույթի մասին: Հետազոտական աշխատանքը հաջողված էր, իսկ քաղաքացիների կարծիքը հիմնականում` բացասական:

·         Իսկ  թե  ինչպես  ներկայացավ հինգերորդ խումբը, ավելի լավ էր դիտել որպես հանդիսատես: Մեկնաբանվեց` ինչ է թոք շոուն , երբ է առաջացել, ով է  հիմնադիրը (1967թ. Ֆիլ Դոնահյու), ապա անդրադարձ կատարվեց հայկական թոք շոուներին` «Ազատ գոտի» , «Հայոց հարց» (« Հ1»), «Կիսաբաց լուսամուտներ» ,«Արի ամուսնանանք» (վերջինս չի ընդունվել հասարակության լայն շերտերի  կողմից) («ATV»), «Կենդանի մատյան» («Արմենիա TV») , «Թեժ անկյուն» («Արարատ»):

Եվ ինչն էր ամենադիտարժանը. հինգերորդ խումբը  տեղում կազմակերպեց թոք շոու` հրավիրելով մասնակցելու չորս խմբերից մեկական ներկայացուցիչ:Հարցադրումները դիպուկ էին, հակասական, համապատասխանում էին հաղորդման ձևաչափին:Հնչեցին հետևյալ հարցադրումները.

1.      Մշակութային հաղորդումները արդյո°ք նպատակաուղղված են ազգային դիմագծի պահպանմանը:

2.      Գաղտնիք չէ, որ սերիալները մարդկանց նստակյաց են դարձնում. մինչդեռ  մենք  խոսում ենք առողջ ապրելակերպի մասին:

3.      Արդյոք ճի°շտ է ընտրված «Հրեշտակների դպրոցը» սերիալի ֆիզկուլտուրայի  ուսուցչի  կերպարը:

4.      Լրատվական  հաղորդումները ճի°շտ են մատուցում ինֆորմացիան. ինչպիսի°  արձագանք է գտնում այն  հասարակության մեջ:

5.      Հայ  լսարանը պահանջկո°տ է  արդյոք:

6.      Ինտերնետ, թե` հեռուստացույց:

Արդյունքում մեր թոք շոուն բնավ էլ չտարբերվեց եթերային թոք շոուներից: Մթնոլորտը թեժ էր ու  զարմանալիորեն հաջողված:

Դասի ավարտին ուսուցիչը ողջունեց աշակերտների պատրաստակամությունը և գնահատեց նրանց աշխատանքը:

Ուսուցիչ` Ա . Զոլյան