Классный час

Тақырыбы

Ұлы Жеңістің 75 жылдығына орай «Ұлы ерлік – ұрпаққа үлгі»

Осы сабақта қол жеткізілген оқу мақсаттары

Болашақ ұрпақтың Ұлы Отан соғысы жылдары ата-бабаларымыздың асқан ерліктерін, қажымас еңбектерін ұмытпай, олардан үлгі алып, өз еліне, өлкесіне деген сүйіспеншілігін, махаббатын, патриоттық сезімін ояту. 

Жұмыс барысы

Әртүрлі көрнекіліктерді пайдаланып оқушылардың патриоттық сезімін ояту.

Сабақты түсіндіру

 Мұғалім: Жеңіс деген - жақсылықтың сыңары,

Жігер менен құштарлықтың құралы.

Күрескердің арманы мен ұраны,

Қуанышпен мерекенің бұлағы.

Жеңіс...Иә, оны сан миллиондаған адамдар 4 жыл бой минуттап, сағаттап сарыла күтті емес пе? Ақыры олардың үміті мен сенімі ақталды, тілектері орындалды.

Бірақ сол жеңіс оңайлықпен келген жоқ. Жеңіс жолында Отан үшін су кешіп талай миллиондаған асыл азаматтар мерт болды. Жауымен жан аямай шайқасып, ерліктің ерен үлгісін көрсетті. Ана – жарын жоғалтқан жесір, бала – әкесінен, анасынан айрылған жетім атанды. Фашистердің тұтқын лагерінде қаншама ана мен бала айуандықпен азаптап өлтірілді. Ал, тылда қалған қарттар, аналар мен бесіктен белі шықпаған балалар соғыстың қайғы-қасіретін арқалай жүріп, бірде аш, бірде тоқ тынбай жұмыс істеді. Бірақ ешкімнің сағы сынбады. Олардың бойындағы отаншылдық сезім, қолына қару алып сапқа тұрған көптеген ұлт өкілдерінің тізе қосқан бірлігі мен ерлігі Жеңіс сағатын жақындата түсті.

Дәл осынау жадыраңқы жәй күні,

Болса дағы қай ғасырдың қай жылы.

Ұлы Отаным басымды иіп бір минут,

Есіме алам сол бір апат қайғыны.

Қан майданда мерт болған ерлердің рухына 1 минут үнсіздік.

Мұғалім: Адамзат тарихында дүниені дүр сілкіндірген, әлемді таң қалдырған талай оқиғалар өтті. Бірақ солардың ішінде қайғы мен қуаныш жасын қоса жұтқызған Ұлы Отан соғысындағы теңдесі жоқ жеңістің орны бір бөлек.
Ұлы Отан соғысының шежіресі мыңдаған ұлдар мен қыздардың қанымен жазылған қасиетті тарих. Бұл шежіре аласұрған фашизмнің ашкөз қорқаулығы, қандыбалақ қиянаты, адамдарының баға жетпес қажыры мен қайраты, ерлігі, елдік намысы жыр болған өшпес тарих. Ендеше сол соғыста мерт болған  Шығыс Қазақстандық, сіздер мен біздердің біраз азаматтарымыздың жарқын бейнесін, өшпес ерлігін сіздердің назарларыңызға ұсынымын.

Ұлы Отан соғысы кезінде Шығыс Қазақстан облысынан майданға 190 мың адам шақырылды. Оның  83 мыңы ұрыс даласынан қайтқан жоқ. 109 шығыс қазақстандық Кеңес Одағының Қаһарманы атағына ие болды. 24 Даңқ орденінің иегері атанды. 9000 шығыс қазақстандық азамат ҰОС ерен еңбегі үшін төсбелгісімен марапатталды.

Әбділбаев Тұрысбек

1921 жылы 12 қаңтарда Семей облысы, Ақсуат ауданы, Қызылкесік ауыл әкімшілігіне қарасты Қызылтастың күншығысындағы «Зергер» бұлағы жағасында дүниеге келген.
1942 жылы соғысқа аттанады. Соғыста Кавказ майданының 3-ші артиллерия полкінде артиллерист, генерал К.К.Рокосовскийдің 21-ші армиясы 125-ші атқыштар полкінде, генерал И.В.Круковтың атты әскер дивизияларында кавалерист болған. Соғыста екі рет жараланған. Соғысты Берлинде аяқтап, 1945-1946 жылдары Балтық жағалауындағы, Кенисберг қаласында әскери борышын өтеп, 1946 жылы әскерден босап, елге қайтады.1946-1969 жылдар аралығында Ленин жолы, Ақжайлау, М.Горький, Көкжыра, Ерназар, С.Сейфуллин мектептерінде мүғалім, директор, Комсомол, К.Маркс, Амангелді колхоздарында партия үйымының хатшысы, колхоз председателі болып қызметтер атқарды.1952 жылы Қазақстан коммунистік партиясының VI съезіне делегат болып қатыскан.1969-1981 жылдары Ю.А.Гагарин мектебінде оқу ісінің меңгерушісі болып, 1981 жылы зейнеткерлікке шықты.
«Халық ағарту ісінің үздігі» белгісінің иегері. І-дәрежелі «Отан соғысы» орденімен, «Ерлігі үшін», «Варшаваны азат еткені үшін», «Берлинді алғаны үшін», «Германияны жеңгені үшін» медальдарымен марапатталған.
Қонарбаев Мұхаметқали

75- жыл...Ширек ғасырдан артық уақыт...бір адамның өмірі...алтын уақыт!  Адамзат атаулының жанын жегідей жеп, тәніне жара салған, жүректерінде мәңгіге өшпес із қалдырған сұм соғыстың санамыздан көмескіленіп, тарих қойнауына кеткеніне тура 75 жыл. Қуаныш сыйлайтыны Жеңіс туының асқақ желбіреп тұрғанына, аналарымыздың алаңсыз ұйқысы мен сәбилеріміздің шат күлкісі орнаған бейбіт өмірімізге  де осынша уақыт. Аталарымызбен апаларымыздың қасық қаны тамғанша жан аямай күресіп жеңіп алған Ұлы Жеңісі, бізге аманатталған бүгінгі ынтымағы жарасқан мамыражай бейбіт өмір қазақстандық боздақтардың ерен ерліктері мен аналарымыздың төккен қан мен терінің жемісі екені даусыз. Кешегімізге үңілмей болашағымызды жарқын ете алмасымыз белгілі. Осынау қанды қырғын, сұрапыл соғыста жеңіске жету үшін Шығыс Қазақстаннан 182 мың адам майданға аттанды. 96 мыңы қайтпаған. Қан майданда әскерлер алдыңғы шептерде қан төксе, тылда жан аямай еңкейген қарттан бастап, еңбектеген сәбиге дейін өз үлестерін қосты. Зұлмат  соғыс - бүкіл халықтың басына төнген сонау нәубет жылдар бүгінгі жас ұрпақтың әрқайсысымен байланысты екені анық. Біреуіміздің атамыз, енді біреуіміздің әкеміз, ағамыз, бауырымыз, анамыз, апамыз, туысымыз... Жас өмірлерін оққа төсеп Отаны мен Елі үшін жандарын пида еткен боздақтардың қаншамасы біздің болашағымыз үшін, жарық та тыныш бүгініміз үшін, жер бетіндегі күллі тіршілік үшін жер жастанып кете барды. Қайтқаны тыл өміріне араласып мүгедек болып оралса да аянбастан тер төгіп еңбектенді. Осы күнде қалғандары саусақпен санарлық қана.

Деректерге сүйенсек: Қазақстаннан Ұлы Отан соғысына 60-тай ақын, жазушы қатысқан екен. Соның 48-і қазақ ұлтының өкілдері. Сондай жандардың бірі әрі жерлесіміз, әрі жұртшылыққа талантымен танымал Төлеген Тоқтаров

Ел қорғаған майданда жас арыстан,

Тоқтаровтай артында қалар дастан Жас қазақ!

 Бәрің соған ұқсап бақ!

Отты жылдарды жырлап та, айтып та, тауыса алмасымыз анық.

Соғыс жылдарындағы осынау бір айтулы жырлардың қорытындысы ретінде Бауыржан Момышұлының мына өлең жолдарымен аяқтасам деймін:

Сүңгіген ақ боз мініп сезім отқа,

Сардардың жұта алмайды сөзін оқ та.

Қолпашты көтермейтін өмірінде,

Мақтауға болады енді өзі жоқта

Ұлы жеңістің 75 жылдық мерей тойы құтты болсын!

Батыр ұл есімдері сақталады,

Жыр болып жүректерде жатталады.

Ғасырдан ғасырларға аңыз етіп,

Ұрпағы мәңгі бақи мақтанады.

Тапсырма

«Ұлы соғысқа 75 жыл» шығармалар байқауы

1.      Мен бабаларыммен мақтанамын елімді менің қорғаған

2.      Отан үшін от кешкен ер тұлғалы батырлар

3. Батырлар рухы балаға үлгі

Үйге тапсырма

Ұлы жеңіске 75 жыл мерей тойына  арналған суреттер байқауы