Конспект "Сагълыгъым-байлыгъым"

№14 ДЕРС.  Сагълыгъым - байлыгъым.  

       С с арифи.

(57—61 с.)

 Дерснинъ макъсатлары

Фенлер боюнджа нетиджелер: талебе [с] сесини талиль эте, бу сесни схемаларда тапа; С арифинен эджаларны, сёзлерни, джумлелерни окъуй;  ресим боюнджа икяе эте, тасвирлей, суаллерге джевап бере. 

Метафенлер боюнджа нетиджелер: талебе ресим боюнджа икяе тизе; вазифе боюнджа мисаллер кетире; аталар сёзюнинъ манасыны анълата; нида, суаль, икяе джумлелерни интонациянен окъумагъа биле, озь ишини баалай.

Шахсий нетиджелер: талебе сагълыкъны сакъламакъ, сагълыкъкъа мукъайт олмакъ, вуджутны темизликте тутмакъ кереклигини икяе эте.     

Донатмалар: кечкен дерслернинъ донатмасыны бакъынъыз.

Дерснинъ кетишаты

I.                  Дерснинъ мевзусыны огренюв

1.           Макъсатлаштырув. Талебелер дерсликнинъ 57—61-джы саифелеринен таныш олалар, яхшы окъугъан талебелер серлеваларны ве ашагъыда берильген аталар сёзлерини  окъуйлар. Оджа: «Насыл мевзуны бугунь музакере этеджекмиз?» Талебелернинъ джеваплары:««Сагълыгъым - байлыгъым» мевзуны музакере этеджекмиз, [с] сесини ве С арифини огренеджекмиз,  метинлерни окъуйджакъмыз». 

2.           Талебелернинъ бильгилерини фааллештирюв. Оджа талебелерден «Сагълыгъым - байлыгъым» аталар сёзюни насыл анълагъанларыны сорай ве суаллерге джевап бермеге риджа эте: «Ресимге бакъып, икяе этинъиз. Къызчыкъ не япа? Онынъ янында насыл айванчыкъ бар? Талим алмакъ инсан ичюн файдалымы? Озь тюшюнджелеринъизнен, фикирилеринъизнен болюшинъиз. Не ичюн «Сагълыгъым – байлыгъым», деп айталар? Инсан сагълам олса, онынъ кейфи де яхшы ола, о озюни яхшы ис эте. Шу себептен биз эр кунь талим алмакъ, емишлер, мейвалар ашамакъ, салкъын сувда ювунып, вуджутны сагъламлаштырмакъ керекмиз. Фикирлеримиз де темиз олмакъ керек. Инсаннынъ гонълю ве тени сагълам олмакъ керек».

Оджа талебелернен 57-джи саифедеки ресим боюнджа чалыша, яхшы окъумагъа бильген талебе шиирни окъуй, къалгъанлары пармачыкъларынен козетелер, сонъра шиирден С арифини тапалар ве талиль этелер.

3.   Талиль къысмы [с] сесининъ огренюви бу арифнинъ окъувынен башлана («эс»). Сонъра серлеванынъ тюбюнде берильген схема боюнджа бу сесни талиль этелер. Оджа талебелерге тутукълар схемада мавы тюснен, къалын созукъларкъырмызы, индже созукълар исе гульгюли тюснен бельгиленгенини хатырлата. Талебелер эджаларны, сонъра джумлелерни  нида, суаль, икяе интонациясынен окъуйлар, берильген сёзлернен джумлелер тизелер (58 с.).Талебелер ресимге бакъып, джумлелер тизелер: Иса нота тута. Асан кемане чала. Суин йырлай. (61 с.)

Окъумагъа бильген талебелер тезайтымны окъуйлар, къалгъанлары оларнынъ артындан текрарлайлар ве пармачыкъларынен таныш олгъан арифлерни тапып, сеслендирелер. С арифини талиль этелер (61 с.). 

Бу ишни битирген сонъ, талебелер арифлер джедвелинде С арифининъ ерини тапалар, ерини анълаталар.

II.              Дерснинъ нетиджелерини субет шекилинде чыкъармакъ мумкюн: «Насыл мевзунен бугунь таныш олдыкъ? Насыл къаидени огрендик? [c] тутукъ сеси ве биз огренген созукъ сеслер арасында насыл фаркъ бар? Насыл аталар сёзюнен таныш олдыкъ?»

III.         Рефлексия къысмы.  кечкен дерслернинъ схемасы эсасында кечириле.

IV.         Къорантада чалышмакъ ичюн тевсиелер. Ана-баба ярдымынен 58-62-инджи саифени окъумакъ, шиирни эзберлемек (58 с.) я да тезайтымны с.60

Скачано с www.znanio.ru