Урок пісьма ў 1 класе " Вялікая літара Р"

Тэма. Вялікая літара Р

Мэта: забяспечыць фарміраванне зрокава-рухальнага вобразу вялікай літары Р, асваенне спосабу яе напісання і злучэння з іншымі літарамі ў складах і словах.

Абсталяванне: Пропісь 1, с. 40, 45, 48.

I.  Этап падрыхтоўкі да засваення новых ведаў і спосабаў дзеянняў

Паўтарэнне асноўных правіл пісьма: правільная пасадка; размяшчэнне сшытка на парце; уменне трымаць ручку (аловак).

II.   Этап засваення новых ведаў і спосабаў дзеянняў.

Аналіз графічнай формы вялікай літары Р. Супастаўленне друкаванай і рукапіснай літар. Зрокавае вылучэнне двух элементаў вялікай літары Р: доўгай прамой лініі з закругленнем унізе ўлева; верхняй лініі, якая пішацца злева направа з закругленнем з двух бакоў.

Абвядзенне элементаў літары Р па пункціры ў пазлах.

Увядзенне новага спосабу дзеяння: узор напісання вялікай літары Р. Аналіз становішча элементаў літары адносна рабочага радка. Першы элемент (прамая лінія з закругленнем унізе) размяшчаецца на рабочым і нерабочым радках. Другі элемент (верхняя лінія з закругленнямі з двух бакоў) цалкам размяшчаецца на нерабочым радку.

Дэманстрацыя настаўнікам напісання вялікай літары Р на дошцы.

1.   Цэласны вобраз літары з падрабязным каментарыем:

–      Пачынаем пісаць на сярэдзіне нерабочага радка. Ставім кропку на дадатковай лінейцы і вядзём прамую лінію зверху ўніз, не даводзячы яе да ніжняй лінейкі. Робім закругленне ўлева, дакранаемся да ніжняй лінейкі і плаўна падымаем лінію ўверх. Верхнюю лінію з закругленнем з двух бакоў

пачынаем пісаць ніжэй сярэдзіны нерабочага радка. Злева направа робім закругленне да сярэдзіны нерабочага радка і вядзём прамую лінію ўправа (уздоўж дадатковай лініі). Робім другое закругленне ўніз і ўлева.

1.   Узор    напісання  літары  па   асобных  элементах   з   тлумачэннем магчымых прыпынкаў для адпачынку рукі і самакантролю.

2.   Цэласны вобраз літары з кароткім каментарыем.

Пісьмо ў паветры вялікай літары Р з апорай на люстраны ўзор настаўніка.

Асваенне спосабу напісання вялікай літары Р. Пісьмо па элементах і цалкам літары Р на радку з павялічаным памерам. Пісьмо літары  у пропісях па элементах і цалкам па пункціры і самастойна.   Самаацэнка (лінеечка на палях).

Навучанне чытанню і пісьму рукапісных складоў з літарай Р.

Чытанне складоў, запісаных друкаваным шрыфтам (умоўны знак “Ракета”).

Чытанне пар складоў: друкаваны склад + рукапісны склад. Чытанне складоў, запісаных рукапісным шрыфтам.

Дэманстрацыя настаўнікам узору злучэння літары Р з іншымі літарамі. Аналізуюцца і адзначаюцца асаблівасці злучэння вялікай літары Р з іншымі літарамі: з’яўляецца дадатковая злучальная лінія, якая пішацца ад ніжняй часткі літары Р управа да пачатку наступнай літары

Замацаванне. Прымяненне асвоеных спосабаў дзеянняў. Спісванне слоў і сказаў з вялікай літарай Р арганізуецца па алгарытме.

Чытанне складоў з рукапісных літар (с. 48, табліца). Дыферэнцыраваная работа на старонках пропісі з частай нахільнай разліноўкай (с. 45).

Рэфлексіўны аналіз вучнямі вынікаў вучэбнай дзейнасці. Падвядзенне вынікаў урока.

Вучні расказваюць, якую літару яны навучыліся пісаць, хорам паўтараюць яе.