История стонавления адыгейского языка

Синэнэ  1эш1оу  синэнэ  к1асэм Сэ  къыс1уилъхьагъэр  сиадыгабз. Сыдэу  тхьар  еуи  зыбзэ  к1осагъэм, Лъэпкъым  ынапэр  иныдэлъфыбз. Нэхэе Р. Сыбзэ ­  си Дунай,,, Мы гущы1ит1ум мэхьанэшхо я1. Ц1ыфыр къызыхъук1э, быдзыщэм игъусэу ныдэлъфыбзэм  имэкъамэмэ  дунаим хащэ.  Ц1ыф лъэпкъ пэпчъ ныдэлъфыбзэ и1. Сэ синыдэлъфыбзэу,  дунаим иш1угъэ къысфызэ1узыхыгъэр – сиадыгабз.   Бзэр – лъэпкъым ыпсэ  зан.  Дунаир зэрэзэхифырэр, ар зэрилъэгъурэр,  ащ ш1уагъэу къыхихырэр,  игухэлъ – гупшысэхэр, ихэбзэ зек1уак1эхэр, дэхагъэу щы1ак1эм хэлъыр –  зэк1эми ныдэлъфыбзэр анэсы. Ныдэлъфыбзэр к1оч1эшхоу, зэк1ужьэу,  гъэк1эрэк1агъэу лъэпкъым идунэееплъык1э егъэнэфы, игулъытэ  егъэбагъо,   ащ к1уач1эрэ л1ыгъэ­блэнагъэрэ хилъхьэзэ  лъэпкъым  фэ1орыш1э.                   Синыдэлъфыбзэу  сиадыгабз…. Имэкъамэхэр орэдышъоу къысэ1у,     псыхъом ижъынч макъэ щызэхэсэхы, шым илъэмакъэ ар къыпэджэжьы,   жьыбгъэм ишъуи макъэ къыдежъыу.  Сиадыгабзэ  дунаим идэхагъэ  зэхысегъаш1э. Сэ сырэгушхо синыдэлъфыбзэк1э сыгу ихъык1ырэр   къызэрэс1он зэрэслъэк1ырэмк1э, адыгэ жабзэ зы1улъ ц1ыфмэ сызэращыщыр.      Сырэгушхо сыфитэу  тыбзэк1э  дунаим  идэхагъэ къис1отык1ын  зэрэслъэк1ырэм. Сырэгушхо тидунай идэхагъэ, сыгу ихъык1ырэр  синыдэлъфыбзэк1э къэс1он зэрэслъэк1ырэмк1э. Сиадыгабзэ – лъэпкъ ш1эныгъэм игъэт1ылъып1, лъэпкъ дунэегуры1уак1эр  зэхещэ, ш1ум, дэхагъэм  тыфещэ.  Синыдэлъфыбзэ  лъэпкъым къыщыш1рэ  пстэури  зэгъэфагъэу къырехьак1ы, гу зэ1ухыгъэк1э ц1ыфыр дунаим  хегъаплъэ.  Лъэпкъ итэкъухьагъэмк1э  адыгабзэр лъэпкъым зык1ыныгъэ  къезытырэ лъапс, зэрэадыгэр къызэраушыхьатрэ амал. Нэмык1ыбзэ умыш1эным емык1у хэлъэп.  Емык1ушхуи  умыш1эныр  ныдэлъфыбзэр. Убзэ уукъо хъущтэп, уадыгэ ц1ыфмэ уиадыгабзэ ш1у  плъэгъоу, уфэсакъэу ущытын фае. Синыдэлъфыбзэ орэд къырып1ощтмэ ,  гъэтхэ ощх бзыбз, адыгэ усэ уедэ1у зыхъук1э узишъэ ч1эонэ, узхещэ,  дунаим  ш1оу тетыр зэк1э угу къегъэк1ы.  Ц1ыфым иныдэлъфыбзэ 1улъ зыхъук1э, ежь ц1ыфыр къегъэдахэ, ц1ыфым идунэееплъык1э зыфэдэри къыбгурегъа1о.   Синыдэлъфыбзэ акъыли, л1ыгъи, дэхагъи, ш1улъэгъуи, пэгагъи хэбгъотэщтых. Ау тыгъэ пэтзэ ащи бжъыгъэхэр телъхэ мэхъух, арышъ тэ адыгэхэми ,  щык1агъэ тимы1эу щытэп. Тхэтых тэ «сыадыг» а1оу, ау  яныдэлъфыбзэк1э  гущы1ан амылъэк1эу. Ащ фэдэ ц1ыфым, анахь еджэгъэшхор арми, угу  егъунэу ч1ып1э урегъэуцо. Сыгу къео сэ, адыгэ ц1ыфэу зызылъытэхэрэмэ ащыщхэмэ «чылэм узыдэк1рэм  сыдк1э  адыгабзэр  къыпшъхьапэщт» зэра1орэр. Ащ фэдэ ц1ыфхэр сэ  нэпэнчъэхэу сэлъытэ. Сэ синыдэлъфыбзэу сиадыгабзэ сырэгушхо! Сэ сыгу къытеофэ сыбзэ  згъэлъэп1эщт! Шъоум фэд синыдэлъфыбзэр, сян адыгабзэр, сэ си Дунай  сиадыгабзэр!  Сэ сыбзэ ­ сибаиныгъ! Зытхыгъэр Хьаткъо С.