Конкурс на родном языке "Пусть слово доброе душу разбудит"

     Муниципальное казенное управление образование

                                     «Калкнинская СОШ»

         Конкурс  :   «Пусть слово доброе душу разбудит»

Тема:  «Любовь к родной стране без любви к природе не

              возможно»    на родном (даргинском языке)

Ученица 6 класса Гасанова Анна Амирхановна (11лет)

Адрес проживания: Сел. Калкни  Дахадаевского района РД

Почтовой адрес:  sulejmanov8101977@mail.ru

Телефон:   8-963-417-86-55

Руководитель: учитель родного языка и литературы Магомедова С.Г

  Калкнинская  средняя  общеобразовательная  школа.

                                       12.02.2019 год

     Любовь к родной стране без любви к природе не возможна.

Неш-ват!айчила ва иличи дигиличила дахъал-дег! лер делк!унти, жагали каргьурти, урк!ила х!ялани играхъути дугьби ,гьарил миллатла писательтани ва поэтунани. Амма чилилра  дурибти  дугьбани дурес х!ейрар вег!ла урк!илар г!язизси ват!айчи дургъути дигай.

Сен адамлис дигахъуси сунела ват!ан, се багьандан ил дебали ах!ерси? Селичирад дех!дирхьути ват!айчи диги?

Г!е, илди суалти абдай хьардаибти сари или гьанбикесра асубирар. Сейк!улрив гъари х!у, вег! айкьурси дунъя х!ейгахъес вирусив? Пикридухъах!елли, ак!убмадан селра х!ебалути нушани чебиуси иш дунъя саби. Нушала урк!бази диги гьачамлис миналадирахъути нушала бег!ти саби.  Алавла т!абиг!ят секьяйда жагасил нушани багьла-багьлали пикрибирулра. Дубуртала ахъдешра,  хьанц! закла амъурдешра, кабухъун х!ерк!ла хъярхъдешра, диркьурбала авадандешра савгъатдарили сари нушаб т!абиг!ятли. Бухъунси ц!уэрлизив  дуц!румла буц!ар барх!и  дубурла бек!личи кайили х1ерик1алли,  , адамли чебиуси сурат машгьурти суратчибани белк!унсигъуна билзан. Дила мяшт!и дулхъахъуси , ак!убти мер-мусаличи пахрубирахъуси дубуртала чебкад гьайбатли урцуси ч!ака саби. Цабара гьигьбатес кайили, т!абиг!ятла макьамтачи лех!ахъалли, аргъес вирули сай бухъунси багьласи дяг!ла вяшаръала, селичилал дуч!ути арцантала агурби. Закирти гъагулти,  х!язтариркьух!ели рурсили сунела  нячурбиван  , дяг!ли  ита-иша дирхъули сари. Чидил дигара  дусла манзил биалра, нуша-алав т!абиг!ятла сурат х!улби черх!есесли жагаси бирар. Янилизир к!ап!диру нушала хамти дубурти дях!ила ц!уба капарайли. Паргъатси гьанк!лизи г!елайхъур к!ухдик!ули кадухъунти варачанти. Дускалан аваданти диркьурбира, зумати вац!урбира. Бишт!атицун бирар дураб чебиути, илдира чула х!яз барес гъяймачил гьаргала дурабухъунти. Амма кабулхъуси х!ебла ванаси берх!или дях!и биц!ахъу. Г!ур гьардик!ур шиниш кьар,  кьарличил дурадулхъан гулвавни.  Табасарантла хьунрани  някъишдарибти т!амсниван , верх!ел журала вавнани даршили сари нушала  дубуртира. Х!ебличил дех!дирхьур шантала х!янчира. Хъубзури дурабулхъан чула хъумачи. Анк1и дег!ес г!яг!нили сари, кьац! бирес г!яг!нили саби. Бег! гьалар ват!айчи дигай т!абиг!ятличир дех!дирхьалли, к!иибил бетарули саби нушаб хала нешанани ва дудешунани нуша гушх!едиахъес чула някъбани бак!ахъибси кьац!. Х!еблизиб бех!бихьили г!ебшнилизи бикайчи мугьлатагарли бузули саби халкь , г!ях!си сабухъ  сархес багьандан. Г!ебшнила маркнира дахъ бизиси ,  зярх!си т!емличил дашаргу. Шила ца дубличир итилличи кабилзан верх!рангла зурх!ябра. Ват!айчи диги ибси девлизиб халаси мяг!на лебси саби. Илди дигира , ах!ердешра , г!язиздешра мер-мусаличицун ах!ен , илди мер-мусаличиб х!ербирути адамтачира , илдала хасиятуначира ,  г!ядатуначира , дучили дуч!ути далуйтачира,  хабуртачира дархли сари. Нушала Дагъистан дахъал миллатунар улкала саби. Гьарил миллатла халкьла чула адамтира , мер-мусара,  илдала мезра ,  г!ядатунира Дагъистанлантала уржибдеш , ляг!ну-якьутла къаркъубани исбагьила гьайкарван, жагали пархбик!ахъес дарибти сари.

Барх!ехъла замана , чула х!янчира тамандарили , х!яйван-къачара дучили , бухънаби чула бамсри ахъес , шадирла барес гумайлизи дурабулхъути саби. Кабиили хабурти дуру , масхурти  дуру , г!ямрулизир чучил кадикибти анц!букьуни гьандиркахъу, алавла г!ялам шадбиэсли далай буч!а , делхъ  диру. Уршбала хьунрани барили беркала лебху. Г!ур багьла-багьлали чула хъулрази аркьян.

Халати къияндешуни дак!ибти сари нушала ват!айчи дургъбала заманара. Чум-чумра нушала даршути адамти  кабушибтири гъармукаби чебухъунх!ели , чумра чулахъбарибтири, някъ-кьяш агарбиуб чумилра г!ях!гъабза, бахъалгъунти къел-х!ерзилра агарли, х!ярибихьес илдала кьаркьалалра баргес х!ебиубли беткахъибтири. Мут!иг!х!ебик!ути дубурлантас чеббиц!ес багьандан урк!ец!иагар душма г!яскуртани бучили бургъантала бишт!ати дурх!ни ва бухъна бег!ти ябнала илхъилизи пасбарихъибтири. Ил мерличибра т!абиг!ятлис асар бетаур, марка барибх!ели баягъи итди талапбарибтала х!ила к!ав бетарар. Ват!айчи диги т!абиг!ятлизирцун ах!енну дирути, ил батахъес нуша даршуси дунъяличир х!ердиахъес чула жан ах!ерх!едарибти бургъантачира сари.

Ват!айчи ва илала халкьла бузериличи пахрубарес дирулра нушани , нушала улкала сабухъ дурала улкнази бихух!елира , чягъир дарес  т!ут!и диалра.

Камх!ебирар ват!ан машгьурбарести пагьмукарти адамтира. Ца-цали адамти халбиралли , биэс бирар халкьла диги сархибти писательтира, поэтунира , далайчибира, делхъчибира халах!аберхурли чула х!янчира ункъли  бузахъули сабира х!еркабирути тухтурти ,  учительтира. Мер-муса яра миллат х!ясибли касах!елли , г!ярбук!ла мургьи-арцла устни , баягъи  нушала  улкалисцунра ах!и , дурала улкназибра  дебали машгьурти , хъярбукла мегьла устни , болхарла т!алх!янала устни , табасарантла т!амсни диранти багьадурти. Нушала ват!ан машгьурбарили саби г!ур тикрарх!ебиэси Дербентла къалалира.

Леб дила улка дигахъис ,  ил наб дебали  ах!ерли саби бик!ути пандахьибира ,  саби биалли дурала улкнази гечбирути , итаб белч!уди г!яхси кайсули саби бишт!атани или , барибси х!янчилис нушаб лугуси багьара халаси саби или, бик1ути. Саби ак!убти мер-мусаличи карц!ли биалра , бак!или дусли цайналра тухумти чебаэс ,  бебк!ибти неш-дудешла х!ябличи гьарбак!ес, гъят!дирути хъулрачи х!еруди барес х!яяли кьабулбирули  ах!ен. «Наб дила Ват!ан дебали дигулра « ибти дугьби дурнилизибцуну гьат!и мяг!на. Дугьби дурес чили дигара вирар. Илди дугьби мардарести баркьудлумира дирес г!яг!нили  саби.

Ват!айчи дигиличила чум-чумра далайра , х!ябкубра , хабарра делк!и лер наб гьаларра. Чумра ванати дев дуриб халати г!ялимтанира, дунъяла г!ях!ра вайра чедаибти духути адамтанира. Илдала мяг!ничерти дугьбала гьалар дила к!ел тугъ  селизилра дулхъути  ах!ен , амма наб дила Ват!ан , ну ак!убси , ну халараахъибси Ват!ан , дила неш-дудешра , хала бег!тира чула г!ямрула гьарил барх!и , гьарил гьигь айхъули калунси , къиянти-чябхъинтазибад берцахъили нушачи баахъибси Ват!ан дебали дигахъис ва иш шалал дунъяличир миц!ирли лералли хъумх!ертис. Нушази хъумкартахъурли , лайбак!ахъили , палакатбарахъили дунъяла дях!личибад бегъахъесрив ил х!или дясун някъбачил бургъули , кьяшми агарти ч!ич!лумиван ванзаличиб хъусли  башули батахъурси. -Юх,  ах!енри ! Нушала юртанала чедиб гьачам амъурси закра ,  ванаси берх!ира диахъес сабри. Х!ебиалли, х!урматла юлдашуни , илдигъунти къиян-жапа г!елар датурли нушачи баибси нушала даршуси Ват!анла г!янжила гьарил кьякь  ах!ербирес г!яг!ниси саби! Дигахъеная х!уша ак!убти мер-муса , х!уша халакадиахъубти дубурти , х!ушала гьарил бисала т!амара , дукелц!ира г!ед -г!едалгьути шурми  ,  бег! гьалар х!ушала дишт!а кьяшмани ганздарибти авлахъуни , милиги ихъахъути х!урк!бала дярг!ибти шин , варъайчирра мурити г!инци-хъярла унхъри , шиниша зумати вац!урби! Илди мер-муса х!ушачи даималра х!ерли дирар , х!уша разидешличи разидирар , пашмандешличи пашмандирар ,  мурт х!уша дак!адаллира, х!улдурк!ар , х!ушаб разити дях!личил гьунидиур. Х!уша ак!убси Ват!ан – ил саби х!ушала гьарли-марси хъали , илини х!уша хьурадирура, сегъунти диадаллира , г!ердурцура, мурт ва чинар диадаллира.

                                  Дила ах!ерси Ват!ан , х!ед ну даим дезарик!улра!