Конкурсное сочинение на конкурс "Пусть слово доброе душу разбудит"

МКОУ «Ругельдинская СОШ» Сочинение. «К1алъай дунгун, эбел» Дир эбел Давудова Хадижат Муртазаг1алиевна гьаюна  1973 соналъул 12 леб июлалъ Советский( Шамильский)  районалъул Ругъелда  росулъ учителасул хъизаналда.  Лъуг1изабун Ругъелда анц1го классгун ц1ализе лъугьун йиго  Буйнакск медучилищаялде. Хадуй х1алт1изе яч1ун йиго мадугьалихъ бугеб Мусрухъ росулъе фельдшерлъун. Гьебго  соналъ росасе кьун йиго дир инсуе Г1алиласе. Талих1аб  хъизаналда гьарун руго цо ясги, лъабго васги. Бищун  гьит1инав дие эбелалъ ц1ар кьун буго Г1абдурах1манилан  абун. Эбел­ дие ккола инсанасул пикрабазул аслу, дун  свакаларо эбелалъул сипатал цереч1езарун. Дида т1оцебе  рак1алда буго, садикалда Ц1орол ясалъ сайгъатал кьолаго,  гьелъул гьумералъул берцинлъи, дир эбелалда релъараб  бук1ин. Эбелалъул кунч1и кибего щола Канлъиялъул нухда хвасарлъи лъазе Хинаб недегьлъиялъ берал рагьула Намус къанщулареб къадруялъ ч1езе Г1умруялъ эбелалъ толеб х1еренлъи Х1алимаб г1амалалъ г1олеб берцинлъи Бет1ергьан Аллагьас кьолеб хиралъи Эбелалъул х1ат1икь алжан камиллъи. Эбелалъул гъасда кенч1олел ц1адул х1енх1азул,  меседилал бераз, зодихъ  ругел ц1вабзаздаса ц1ик1к1ун  канлъиги хинлъиги кьола. Эбелалъул рек1елъ гурх1ел,  рек1араб ц1а г1адаб бук1уна. Рагьдухъе щваравго каркнде  къала, къалъийилан абун дун веэдула. Ва дагь­дагьккун дида  бич1ч1ана эбелалъул цо сунцаялиго рах1ат хвезабулеб  бук1ин. Дах1абабаца эбелалъе уколал гьарулел рук1ана. Дида к1олебани, хирияй эбел, Босун гьаб дуниял дуе кьелаан, Пашманлъи, къварилъи дуда аск1обе Къазе кинго дица биччалароан. Бичасул х1укмуялда щиб гьабилеб?  Почкаби унтун ругилан абуна дир хирияй эбелалъул.  Ункъабго лъимерги дах1абабал эбелалъухъ тун, эбелги  дах1абабаги ана Москваялде операция гьабизе. Дир  к1одоэбелалъ г1адаб гьунар цониги ч1ужуг1аданалъ гьабун  батиларо дунялалдайин ккола дида. Дах1абабаца дир эбел  сахлъизелъун операцияги гьабун бахъун жиндирго почка  кьуна дир эбелалда лъезе. Унго йигодай ракьалда дир г1адай  дах1абаба. Дие гьей кутукалда йокьула. Кицаби бицанк1аби гьелъ дие г1емер рицуна. Гьуинаб хабаралда, хурире,  авлахъалде дунги дах1абабаги кирего цадахъ щола. Дунги  дах1абабаги рокъоре щвелалде, дах1абабал  эбелалъ  х1адурун батулаан  т1аг1амаб квен. Дица рокъове щваравго  баркала кьола гьезие, бакараб ц1аялъухъ, хинаб квиналъухъ,  эбел унтарайлъи лъазе теч1елъухъ. Т1адеги нусго сон батаял  улбул, бач1унгеги дие нуж камураб къо. Дир эбел­эмен  Москваялда тана, росулъ яшав гьабизе зах1малъулин  эбелалъеян. Сардил макьуялъулъ рик1к1адеги щун Дун мунгун дандч1вала хирияй эбел. Хурхун габуралда къвал дудаги бан Къваридаб дир рек1елъ решт1уна рохел. Рохел бук1уна дие риидалил каникулал рач1ине.  Москваялде ине эбел йихьизе. Дица х1аракат бахула эбел  йохизе лъабилаб  гьеч1ого ц1ализе. Рагъуй квалкадулез, квешлъи ургъулез Эбел цо лах1заталъ цее ч1езае. Гьелъул рек1ел бух!и  г1адахъ босани Г1умру дунялалда алжанлъилаан. Ана саг1тал, къоял, анц1абго лъаг1ел. Тана гьаб дунял  дий бищун хирияй дах1абабал эбелалъ. Гьале нахъойги  вокзал, дун росулъе нухда рег1улей  дир хирияй эбел. Мун щай къварилъулей г1азизай эбел Г1аданир бералги маг1ил ц1езарун. Аллагьасул х1укму кинан хисилеб Бихьарабги х1ехьон ч1ани гурони. Лъала, эбел, лъала дур рек1ел бух1и Ургъелабаз керен кваналеб бук1ин. Бич1ч1ула, хирияй, бадиса маг1у К1алъан яхъиналде щай гирулебан. Эбел! Эбел .  Халкъияб бицен. Эбелалъул рак1 лъималазда лъалебани, гьей егараб  бак1алда т1ад квер бахъун гурони, кьижилароан. Эбел йигей ясалъул къаданибжо  борхатаб.  Эбел разилъич1ого, яс ч1ужулъун ячунге. Эбелалъухъ г1ин т1амуларей ясалъ чияхъ г1ин  т1амуларо. Эбелалъул ургьисанго, ярагъгун, чугун чи вач1унарев.