Конспект урока по кабардинскому языку по теме "Изложенэ" (3 класс)

Темэр. Изложенэ «Пц1ыр ныбжьэгъугъэк1уэдщ» Мурадыр.  Яджа пэжырытхэм и хабзэхэр къагъэсэбэпурэ изложенэм и  текстым пэгъунэгъу хъыбар ятхыфу есэн. Урокым къэгъэсэбэпыпхъэр. Иложенэм и текст, интерактивнэ доска.                       Урокыр зэрек1уэк1ынур 1. Урокым зэрыхуэхьэзырымк1э (зэрылэжьэну 1эмэпсымэхэмк1э  къызэрызэгъэпэщар) еджак1уэхэм зыкъегъэпщытэжын. 2. Изложенэм елэжьын       1) Текстым къахуеджэн.                              Пц1ыр ныбжьэгъугъэк1уэдщ     Бажэри уашхэри мэжал1эрт. Я тхьэмыщк1агъэ зыти, а т1ум  зэныбжьэгъуну мурад ящ1ащ. Зэгъусэу к1уэурэ зы джэд щ1элъэныкъуэ  къагъуэтащ. Уашхэм ар т1уми зэдашхыну и гугъащ. Ауэ ар бажэм  идакъым.  Хабзэк1э ар нэхъыжьым псори ишхын хуейуэ жи1эри я ныбжьыр зэпабжу  хуежьащ. Уашхэм жи1ащ ар щ1ым зэпц1ын щ1идза къудейуэ щыщытым  къалъхуауэ. Ар зэрызэхихыу бажэр гъыуэ хуежьащ. Уашхэр гузавэри абы  къыщыщ1ам щыщ1эупщ1эм, бажэм ерагъыу и гъыныр зэпигъэуащ. А щ1ыр  щызэпц1ыгъащ1эм хыхьэу и къуэ пажэр хэк1уэдати, ар игу къэк1ыжауэ  гъыуэ жи1ащ абы.    Арати джэд щ1элъэныкъуэр бажэм лъысу къыщ1эк1ри ишхащ.   Ежьэри зыкъомрэ к1уауэ зы мэл щ1элъэныкъуэ къагъуэтащ. Ари хабзэк1э  шхын хуейти, бажэм къыжи1ащ ахэр гъуэлъу жеин хуейуэ ик1и нэхъ  пщ1ыхьэп1эф1 зылъагъум лыр ишхыну хуит хъууэ. Арати, гъуэлъахэщ.  Къэтэджыжа нэужь, уашхэм и пщ1ыхьэп1эр къи1уэтэжу щ1идзащ.  Дуней ф1ыгъуэм хэтауэ жи1эрт абы. Шхыныф1у щы1эр ишхауэ жи1эурэ  кърибжэк1ырт. Ит1анэ бажэр къэпсэлъащ.   ­ Сэ къэсщ1ат а ф1ыгъуэ къомыр уэ зэрыпшхар. Мэлыл къэдгъуэтами  ухуэмеижу къэслъытэри сэ сшхащ а т1эк1ур, ­ жи1ащ абы. Абдежым  щаухащ а т1ум я зэныбжьэгъунри.     2)Псалъэ зыщыгъэгъуэзапхъэхэр: тхьэмыщк1агъэ, зэпабжу,  щызэпц1ыгъащ1эм.    3) Интерактивнэ доскамк1э къыдогъаджэ.   4) Упщ1эхэм жэуап ирыдогъэт.            Сыт бажэмрэ уашхэмрэ зэрихьэл1эн хуей щ1эхъуар?            Сыт абыхэм къагъуэтар?            Сыт хуэдэ 1эмал къигупсыса бажэм?            Хэт джэд щ1элъэныкъуэр зышхар?            Ет1уанэу сыт абыхэм къагъуэтар?           Сыт аргуэру бажэм хьилагъыу хилъхьар? Сыт бажэр щ1эгъар?            Хэт мэл щ1элъэныкъуэр зылъысар?           Сыт уашхэмрэ бажэмрэ я зэныбжьэгъугъэр щ1эк1уэдар? Хэт ар зи  зэраныр?          Сыт хуэдэу зэхущытын хуей зэныбжьэгъухэр?          Сытым ухуиущийрэ мы псысэм? 3. Текстым план хузэхегъэувэн                                   План       1.Уашхэмрэ бажэмрэ зэрохьэл1э.      2. Джэд щ1элъэныкъуэр зэрагуэшар.      3. Мэл щ1элъэныкъуэр зэрагуэшар.      4. Уашхэмрэ бажэмрэ я ныбжьэгъугъэр щ1эк1уэдар. 4. Псысэр текстым пэгъунэгъуу къыжегъэ1эжын. 5. Изложенэр егъэтхын. 6. Ятха изложенэм къегъэджэжын.